Roble Shipping, Unilink mihakot og laing daog

CEBU, Philippines – Milansang na sab og laing daog ang Roble Shipping ni George Uy batok sa Powerball, 94-85 pagsugod sa second round sa elimination sa Sunriser/Powerball Friendship Cup 2009 basketball tournament niadtong Domingo didto sa CEC gym.

Milabaw og 10 puntos sa halftime, 47-37, ang Roble Shipping miaksiyon og takilid dihang wala mahitsura ang ilang duwa hinungdan nga misikit ang Powerball ngadto sa tres puntos, 68-71 pagsugod sa fourth period luyo sa paningkamot nilang Jimbo Noel ug Lando Luces.

Hinuon, ang Roble Shipping nakarekober sa maong kuwarter pinaagi sa ilang makalilisang nga atake ubos sa pagtimon nilang Teyoy Lim ug Gary Maquelan aron inaton og balik ang labaw dayon pagkulit og daog.

Si Lim mihakot og 27 puntos aron pangulohan ang Roble Shipping, samtang si Maquelan midugang og 18 puntos.

Si Noel maoy nangulo sa Powerball pinaagi sa iyang 24 puntos. Si Luces mi-iskor og 12 puntos alang sa Powerball.

Sa laing duwa, gipanitan sa Unilink Shipping ang dinaug-daog nga Vic Enterprises, 106-81. Ang Unilink miposte sa ilang kinadak-ang labaw nga 84-48 human sa third quarter.

Si Alwen Tabasa mi-iskor og 24 puntos alang sa Unilink, samtang ang ilang skipper nga si Paul Quiñanola mitunol og 15 puntos.

Ang walay daug-daog nga Vic Enterprises gipangulohan ni Erwin Budiongan, kinsa miburak og 33 puntos.

Puntos Matag Usa

Unang duwa:

Roble Shipping (94) - Lim 27, Maquelan 18, Aberia 12, Carpio 11, Uy 10, Gabatan 9, Sestoso 7

Powerball (85) - Noel 24, Luces 12, Fuentes 10, Carhuana 10, Mendoza 9, Lausa 7, Malinao 5, Cuetara 5, Estorba 3

Ikaduhang duwa:

Unilink (106) - Tabasa 24, Quiñanola 15, Anadon 14, Garcia 12, Kwan 11, Seno 10, Navarro 7, Baclay 7, Adarna 4, Petallar 2

Vic EntERPRISES (81) - Budiongan 33, Ho 14, Mengane 12, Bullo 11, Uy 11, Silvano 10 –BANAT NEWS