Time Out cage clinic

CEBU, Philippines - Mga batan-on nga adunay hilig og basketbol may kahigayonan pagbaid sa ilang talento nunot sa pagpahigayon sa Time Out Basketball Clinic nga gikatakda karong Abril 5 hangtod Mayo 5 diha sa Cebu Coliseum.

Ang training gibuak sa duha ka levels -- ang beginners ug ang advanced. Ang beginners himuon sa alas-8 hangtod sa alas-10 sa buntag, samtang ang advanced gikan sa alas-10 sa buntag hangtod sa alas-12 sa udto.

Modumala sa tinuig nga basketball clinic mao si Rey Salvaña, kanhi assistant coach sa Cebu Gems sa nabungkag nga Metropolitan Basketball Association (MBA).

Si Salvaña nahimo sab nga chief bench tactician sa Misamis Oriental Meteors sa nabungkag na sab nga Mindanao Visayas Basketball Association (MVBA).

Moabag ni Salvaña sa training camp mao si kanhi pro ug commercial star Marcelino 'Teroy' Albarillo ug Reggie Licanda, kinsa mao karon ang head coach sa University of Cebu (UC) Junior Webmasters sa Cebu Schools Athletic Foundation, Inc. (CESAFI).

Ang Time Out mopunting og mga fundamentals sa basketbol sama sa proper passing, dribbling, shooting ug footwork.

Ang usa ka bulan nga clinic bukas ngadto samga lalaki ug babayenga nagpanuigon og 17anyos. Aduna kini registration fee nga P1,200 matag entrante, libre na ang training jersey ug basketball.

(Yoyo R. Abayan)      (BANAT NEWS)