Spurs Kaging Sa Hornets, Lakers Gidagit Sa Hawks

CEBU, Philippines - Gitimonan ni Chris Paul ang New Orleans Hornets aron pagposte og 90-86 nga kadaugan batok sa ilang higpit nga karibal sa Southwest Division nga mao ang San Antonio Spurs atol sa nagpadayong aksiyon sa National Basketball Association (NBA) didto sa New Orleans Arena sa New Orleans, Louisiana.

Si Paul mihakot og 26 puntos lakip ang duha ka krusyal nga free throw sa kataposang siete segundos aron pangulohan ang Hornets nga aduna nay 45-27 nga baraha.

Si David West kinsa mi-iskor og 11 out of 11 sa free throws, midugang og 23 puntos ug 16 ka rebounds. Ang Hornets may makabungog nga 32 sulod sa 33 ka free throws.

Ang 48-25 nga Spurs gipangulohan ni Tony Parker sa iyang 20 puntos, may 19 puntos si Tim Duncan ug 15 ka rebounds samtang si Manu Ginobili may 17 puntos.

Didto sa Quicken Loans Arena sa Cleveland Ohio, ang Cavs mirehistro sa ilang ika 35 nga daug sa ilang homecourt ug padayong nangu sa NBA sa ilang 60-13 nga baraha nunot ang 12 ka sagunson nga daug nga nahimong franchise record dihang ilang gikulata ang Dallas Mavericks, 102-74.

“We just take care of the business,” matod pa sa ilang superstar nga si LeBron James.

Ang Toronto midaug batok Chicago, 134-129 sa overtime, na-upset sa Minnesota ang New Jersey, naka-ipsot ang Detroit batok sa Philadelphia, 101-97, gilubong sa Boston ang Oklahoma, midaug ang Indiana batok sa Washington ug midaug ang Sacramento batok Phoenix, 126-118. (GGM)   (BANAT NEWS)