Clinics

CEBU, Philippines -  Unya sa Miyerkules, Abril na usab.

Sugod Abril 1 hangtod mahuman ang summer vacation, motumaw na usab ang nagkadaiyang mga clinics, training camps, seminars, workshops o mga voice lessons, piano lessons ug mga dance lessons.

Halos tanang mga gymnasiums dinhi sa dakbayan sa Sugbu na-fully-booked kay gipangkontrata na daan sa mga coaches, camp directors, trainors o mga professors alang ning maong katuyoan.

Kalagmitan natong makita mao ang basketball clinics nga daw nagkompetensiya-anay na gani hinuon tungod sa kadaghan.

Kaniadto, ang una nakong nahibaw-an dinhi sa Sugbu mao ang basketball clinic sa YMCA nga gidumala ni coach Eddie Montalban. Dayon miabot ang mga katuigan nga nahimong regular na ang pagpahigayon sa Milo-BEST (Basketball Efficiency Scientific Training) matag tuig dinhi sa Sugbu.

Sa akong personal nga panahom kalabot sa akong trabaho isip usa ka sportswriter, daku kaayo’g natabang kining Milo-BEST dinhi sa Sugbu. Kadali man hinuon tinuod ang training nga molungtad lang og usa ka semana, apan dili nato malalis nga hapit tanang mga produkto sa Milo-BEST mo-abot gyud didto sa kinatumyan sa iyang pangandoy nga mao ang pagduwa sa PBA. Ang uban kun dimalason, kutob lang sa PBL, apan nahimo sab silang mga inilang bitoon sa UAAP ug NCAA. Dili nalang nato sila nganlan kay kuwang kining gigahin nga espasyo matag semana kun atong iletanya ang tanan.

Ang Milo-BEST franchise gidumala sa akong higala nga si Nicanor F. Jorge, ang kanhi secretary-general sa karaang BAP sa wala pa kini magubot.

Dinhi sa Sugbu, ang nakakuha’g prangkisa mao si Butch Cabahug.

* * *

Ang mga clinics nga magsugod karong Abril mao ang Hapee Online, Time Out, Sunsport, Sirlitz, Power Play, USC-South ug North, Aces, ACT, Don Bosco, PCGS, Sacred Heart, USPF, UV YMCA ang Walk Tall with Basketball ni Ramon 'El Presidente' Fernandez ug daghan pa kaayo nga naligas sa akong panumduman.

Kaniadto, ang pagpahigayon og clinic naigo lang sa usa ka lingaw-lingaw, apan sa pagka karon, nahimo na kining panginabuhian tungod sa kadaghan nga gustong mokat-on og basketbol. Tungod sab sa kadaghang kapilian, may katungod ang mga ginikanan kun asa nila nga clinic ibutang ang ilang mga bata depende lang usab sa maabot sa ilang bulsa.

Kasagarang mga aktibong coaches ug kadtong kanhi   coaches nga dili na konektado og mga tunghaan o mga commercial teams, nagpahigayon na’g mga clinics ug maoy bugtong nilang kalipay kun ang nga bata nga ilang gitudloan mahimo nang mga varsity players ug nagduwa na sa Cebu Schools Athletic Foundation, Inc. (CESAFI), ang labing dakung collegiate league sa Sugbu ug sa tibuok Kabisay-an.

Mismo kadtong mga retiradong players nga wala gani mahimong coach, nagtudlo usab og basketbol. Dili kini dautan basta lang tinuoray ang ilang pagtudlo dili kay kubot lang sa pagpangwarta.

Sa kadaghan sa mga clinics nga mitumaw, mahimuot na hinuon ako maghuna-huna kun sa pipila ka adlaw, adunay wala kasabot kun unsay clinic ug adto na hinuon mangayo’g tambal o tabletas ang mga kabus nga Sugbuanaon kun ila kining masaypan nga medical clinic.

Dili man sab tingali hisaypan kay lahi man ang clinic sa doktor, sa dentista, optometrist, dermatologist ug uban pang mga medical practitioners.

Ang sa mga medical practioners aduna may door sign nga “The Doctor is IN/OUT, samtang ang mga basketball clinics, judo, taekwondo ug uban pang matang sa clinics, wala may nakabutang sa pultahan nga “The Coach is Out of Reach” o “out of the coverage area”.

* * *

SG Miscellaneous. Welcome back to Cebu Mr. Bruce Cunningham from Fort Wayne, Indiana. To all elementary, high school and college graduates here in Cebu, my salute to all of you. Good luck and more power!  – BANAT  NEWS