CEBU, Philippines - Ang team Delanara nga gimaneho nilang Florian Gutierrez ug Marites Natad sa Southwestern University (SWU) maoy mipatigbabaw batok nilang Ericka Camille Verano ug Apple Saraum sa University of Southern Philippines Foundation (USPF) aron pag-angkon sa labing unang korona sa Talisay Beach Volley Competition niadtong miaging adlaw didto sa landing site sa Brgy. Poblacion, dakbayan sa Talisay.
Gipakita nilang Gutierrez ug Natad ang ilang kamangtas sa duwa aron pagpukan sa tandem nilang Verano ug Saraum.
Sila si Gutierrez ug Natad miabante sa kampiyonato human nila gipilde sila si Jusabelle Brillo ug Ivy Mae Abella sa University of the Visayas (UV). Ang USPF ni coach Jordan Paca miangkon sa katapusang luna sa finals human maka-ipsot sa makutas nga duwa batok sa V-belles nilang Marissa Lagancia ug Kennette Garces, 25-23.
Sa maong kadaugan nilang Gutierrez ug Natad, naangkon nila ang P5,000, samtang sila si Verano ug Saraum mibulsa sa P3,000.
Sa duwa alang sa ikatulong dapit, ang UV gilisud-lisud pa una nila maangkon ang 25-24 nga kadaugan batok sa V-Belles.
Ang maong kompetisyon nga gipasiugdahan sa Talisay City Sports Commission pinaagi sa ilang chairman ug city councilor Rodi Cabigas, usa lamang sa mga kalihukan sa tinuig nga "Takas sa Talisay" celebration. – BANAT NEWS