AMBL Milubong sa Jan Hog

CEBU, Philippines - Gilat-an sa AMBL Enterprises and Advertising ni businessman Allan Lim ang Jan Hog and Cattle Dealer, 102-81 aron pagkulit sa ilang ikaduhang daog sulod sa tulo ka duwa sa elimination round sa Basketball Association of Ramos (BAR) Summer League 2009 didto sa Cogon-Ramos Sports Complex.

 Unang nanginit ang Jan Hog Dealer ug miposte kini og 23-17 nga bentaha sa first quarter luyo sa paningkamot ni Vincent Reyes.

 Apan ang AMBL kalit nga nanginit sa sunod nga mga kuwarter kortesiya nilang Lito Navarro, Flor Loreto ug Fritz Sullano aron pag-ilog sa labaw, 46-41.

Ang AMBL padayong mipahungaw sa ilang kainit sa katapusang kuwarter diin milusad kini og 31-17 nga rally aron pag-ihaw sa Jan Hog Dealer.

Si Robert Abasolo maoy topscorer sa AMBL sa iyang 32 puntos, samtang si team captain Jun Felicitas mipabuto og 14 puntos.

Ang pilderong Jan Hog Dealer gipangulohan ni Louie Navarro pinaagi sa iyang 20 puntos, samtang si Reyes mitampo og 19 puntos.

Puntos Matag Usa

 AMBL (102) - Abasolo 32, Felicitas 14, Alesna 12, Lim 10, Navarro 10, Monreal 10, Loreto 6, Sullano 5, Gallway 3, Tejero 1.

Jan Hod Dealer (81) - Navarro 20, Reyes 19, Noel 16, Cubacha 6, Libre 5, Miscala 5, Regidor 4, Abatayo 2, Leopats 2, Villaber 2. – BANAT NEWS