USJ-R nakauna sa serye

CEBU, Philippines - Usa na lang ka daog ang kinahanglan sa Ave Maria Sanctuary Park/USJ-R Jaguars aron maangkon ang ikatulong dapit pinaagi sa pagposte og 73-62 nga kadaugan batok sa Prime Asia/UV Green Lancers sa Cebu Schools Athletic Foundation, Inc. (CESAFI) Partner’s Cup kagabii didto sa Cebu Coliseum.

Ning pagsulat, ang Game-1 sa "best-of-five" final series tali sa Hotel Fortuna/SWU Cobras ug Enervoc-C/UC Webmasters padayon pang gikumbatihan. Ang duha ka kampo parehong nagtinguha nga makauna sa serye.

Wala magdahom ang Ave Maria Sanctuary Park/USJ-R Jaguars nga ilang madominar ang duwa gikan sa pagsugod hangtod sa katapusang hunat sa maong engkwentro tungod kay ilang nakita nga daw dili ang naandang mangtas nga Prime Asia/UV Lancers nga ilang nakasangka.

Bisan pa sa gihungit nga 16 puntos ni 6-foot-11 center Gregory Slaughter wala kini makapadaog sa Prime Asia/UV Lancers kay ang iyang kaubanan wala kaayo makayagyag sa ilang performance gawas lang ni Elmer Mikael Cabahug, Jr. kinsa mirehistro og double figures pinaagi sa iyang 13 puntos.

 Ang Ave Maria Sanctuary Park/USJ-R Jaguars kinsa miposte sa ilang kinadak-ang labaw nga 20 puntos, 45-25, gipangulohan ni Kurt Amores kinsa mikawot og 16 puntos.

Sila si John Michael Montenegro ug Anecito Lapiz Jr. mikulit sab og double figures alang sa Ave Maria Sanctuary Park/USJ-R Jaguars.

Si Montenegro mipupo og 14 puntos, samtang si   Lapiz miani og 11 puntos.

Puntos Matag Usa

Ave Maria/USJ-R (73) -Amores 16, Montenegro 14, Lapiz 11, Malinao 9, Ponce 7, Delfino 7, Llera 7, Abing 4, Bibera 3, Suliman 3

Prime Asia/UV (62) -   Slaughter 16, Cabahug 13, Silva 6, Olivares 4, Lao 4, Dennison 4, Calo 2, Mercader 2, Sendrijas 2, Manigque 2, Benedicto 2. – BANAT NEWS