Power Forty President's Cup buksan na

MGA DUWA KARON

(Inayawan Sports Complex)

6:00 pm

Water Market vs. UTASSCO

7:00 pm

Nelly’s Farm vs. Park ‘N Go

8:00 pm

Ave Maria vs. www.Fedguns.ph

CEBU, Philippines – Labing menos upat ka teams ang mopakita sa ilang katakus sa Power Forty President’s Cup Summer League nga buksan karong gabii diha sa Inayawan Sports Complex.

Ang defending champion UTASSCO team ni Atty. Flor Yosores makigsangka batok sa Water Market Power Forty president Silvestre Eleguin alang sa pasiunang duwa.

Sundan kini sa duwa tali sa Nelly’s Farm ug sa Park ’N Go Bakeshop ni Romy Rama ug sa Ave Maria/USJ-R Jaguars ni Raffy Senining nga mosukod sa abilidad sa www.Fedguns.ph alang sa ikatulong duwa.

Matud pa ni Power Forty commissioner Edwin Dejacto, ang Water Market mao ang Christine Traders kaniadto, ang Nelly’s Farm mao ang EB & Nelly, ang Fedguns mao ang Hero Commando ug ang Ave Maria maoy mihulip sa Fag Machine Shop.

Ang torneyo mosubay og double round robin format diin ang top 2 teams maoy mag-abot sa finals.

Ang kampiyon makadawat og P10,000, ang second placer makaangkon og P7,000 ug ang third placer mobulsa og P5,000.

Ang duwa pagahimuon matag adlaw'ng Martes ug Huwebes. –BANAT NEWS