Magic diriyot hiapsi sa New York Knicks

CEBU, Philippines - Diriyot mapapas ang 15 puntos nga labaw sa Orlando Magic apan maayo na lang gani kay naka-maniubra sila og 110-103 nga kadaugan batok sa New York Knicks kagahapon sa nagpadayong aksiyon sa National Basketball Association (NBA) didto sa Amway Arena sa Orlando, Florida.

Tungod sa maong kadaugan, nabiyaan na lang ang Magic (51-18) ug duha ka daug tali sa Boston Celtics (53-18) apan tabla sila sa pilde isip ikaduhang labing maayong team sa Eastern Conference luyo sa numero uno nga Cleveland Cavaliers nga adunay 56-13 nga baraha.

Ang Magic kinsa gipangulohan ni Rashard Lewis sa iyang 27 puntos, aduna nay 2-0 nga record batok sa Knicks ug magtiwas sila sa ilang season series unya sa Abril 10 didto sa Madison Square Garden sa New York City diin ilang pasidunggan ang ilang mga banggiitang players lakip na si Patrick Ewing nga mao karo’y assistant coach sa Magic.

Ang laing upat ka starters sa Magic pulos sab mi-iskor og double figures samtang si Quentin Robinson maoy nangu sa Knicks (28-41) sa iyang 33 puntos.

Sa laing duwa, mzidaug sab ang Los Angeles Lakers sa usa ka sikit nga duwa batok sa Chicago Bulls, 117-109 pinaagi sa 27 puntos ni Kobe Bryant.

Ang Boston Celtics mimakmak sa Memphis Grizzlies, 105-87 nga maoy ikaduhang duwa sa pagbalik ni Kevin Garnett.

Midaug sab ang Cleveland batok sa Atlanta, 102-96, midaug ang Indiana batok Charlotte, 108-83, midaug ang Portland batok sa Milwaukee, 96-84 ug gilubong sa Phoenix ang Washington, 128-96. – GGM (BANAT NEWS)