Cebu City padayong mihakot og bulawan

CEBU, Philippines - Padayon nga nangubkob og bulawan ang Cebu City Niños ug miabot na sa 80 paghuman sa ikaupat nga adlaw sa 2009 Central Visayas Regional Athletic Association (CVIRAA) Meet kagahapon didto sa Gov. Mariano F. Perdices Memorial Coliseum sa Dumaguete City.

Lisud na kaayo apason ang 350.5 puntos nga nakuha sa Cebu City kay ang nagsunod nga host Dumaguete igo lang mitali og 141.42 puntos, samtang ang Cebu Province miambak sa ikatulong dapit sa ilang 130 puntos.

Ang Cebu City naka-gold sa lawn tennis, table tennis, gymnastics, swimming, athletics, taekwondo ug badminton.

Sa tennis, ang managsuong Siso maoy mihatag sa Cebu City og upat ka golds sa secondary division. Ang multi-awarded nga si Sally Mae Siso mipukan ni Kimberly Kaye Uytico sa Cebu Province, 8-0 aron pag-angkon sa titulo sa secondary girls singles, samtang ang iyang maguwang nga si Bernardine mi-iskor og 8-4 nga kadaugan batok ni Franklin Encarnacion sa Cebu Province.

Ang iyang igsuon nga si Sally Dine ug katimbang nga si Kristel Mae Buenacosa mao sab ang nanghawod sa girls doubles batok nilang Janice Cañete ug Lucille Goc-ong sa Cebu Province.

Sa table tennis, ang Cebu City mihakot og walo ka bulawan sa secondary division kortesiya nilang Lemuel Agbon, Danel Jay Tormis, Nathaniel Motel, Darbet Tripoli, Elona Dane Tormis, Girly Apas, Candy Babalcon ug Gacy Suico.

Sa elementary division, ang Cebu City nga gibitoonan nilang Paul Locaylocay, Jean Phillippe Honoridez ug managsuong   Jerome ug James Tracyl Impuesto miposte og 15 puntos sa ilang paghari sa boys team event. Sa habig sa babaye gidominar nilang Mary Ann Tapayan, Ma. Rowena Sanico, Charisse Mae Juntilla ug Diana Oliverio.

Sa taekwondo, ang Cebu City mikabkab og tulo ka golds kortesiya nilang Jeah Maglasang (finweight), Jesset Paglinaan ug Lord Jay Guia sa bantamweight division.

Ang Cebu City mihakot sab og walo ka golds kortesiya nilang Charles David Labiste, Ramon Christopher Rosal, Eric Garces Jr. ug Keith Bryan Fernandez sa elementary boys uban nilang Precious Kate Nacorda, Charisse Labiste, Ashera Nicole Dayuday ug Jaysa Anna Gabuya sa elementary girls. – BANAT NEWS