P100,000 gigahin alang sa 2nd Talisay Baruto Regatta Festival
CEBU, Philippines - Adunay kinatibuk-ang P100,000 nga ganting salapi ang ihatag ngadto sa top performers sa 2nd Talisay Baruto Regatta Festival sa dakbayan sa Talisay karong Marso 26.
Matud pa ni event organizer David Odilao Jr. atol sa senemanang SCOOP-Cebu Forum kagahapon didto sa Baseline Restaurant nga labing menos 50 ka partisipante ang gilauman nilang mosalmot sa maong lumba sa baruto.
Ang kompetisyon himuon human sa re-enactment sa Talisay liberation landing.
Ang tanang partisipante moagi sa kadagatan sa Talisay paingon ngadto sa utlanan sa SRP ug sa Lagundi reef.
Ang matag baruto adunay duha ka partisipante, ang main man ug iyang assistant.
Niadtong interesadong mosalmot sa lumba kinahanglang tinuod nga mananagat. Aron sa pagmatuod, kinahanglan nga mokuha sila og sertipiko gikan sa ilang tagsa-tagsa ka mga barangay kapitan. – BANAT NEWS
- Latest
- Trending
