CEBU, Philippines – Pakyas si Seigfred Ornopia, ang 2008 MS Motosuit Motocross “Rider of the Year” pagdaog sa labing taas nga puwesto sa National Open sa FIM Motocross of Asia didto sa Puerto Princesa, Palawan.
Ang top honcho sa Keiz BJ Racing Team nga si Ornopia, nag-una sa first moto, apan tungod kay wala kaayo makasinati sa racetrack misukarap kini sa final moto.
Si Ornopia, kinsa nakadawat og pasidungog sa 27th Sportswriters Association of Cebu-San Miguel Corporation (SAC-SMC) All-Cebu Sports Awards niadtong Pebrero 18, napunta sa ikaupat sa executive class ug ikalima sa veterans division.
Sa laing bahin, si Jon-Jon Adlawan, ang bag-ong endorser sa MS Motosuit nahimutang sa ikaduha sa pro open class ug nalakip kini sa top 10 sa international action.
Si Ted Conde sa Team Castrol-Quickflight Racing mipahiluna sa ikalima sa pro race ug ikaduha sa international action.
Gipakita ni Conde ang iyang katakus batok sa mga langyaw’ng rider aron maapil sa top eight sa international competition.
Laing rider sa Castrol-Quickflight mihatag sab og dungog sa Sugbu pinaagi sa pagpahiluna sa ikatulong dapit sa beginners class. (BANAT NEWS)