Best Friends abante sa PPBA q'finals

CEBU, Philippines - Gitumba sa Best Friends Forever ni team owner Shirley Martin ang Airen Five, 72-68 aron pag-abante sa quarterfinals sa Punta Princesa Basketball Association (PPBA) niadtong Huwebes sa barangay Punta Princesa, ning siyudad.

Nagsige'g sinukliay og mga puntos ang duha ka teams hangtod nga nakuha sa Best Friends ang momentum pipila sa nanghinapos nga bahin sa duwa.

Ang Best Friends ni coach Boy Atillo igo lang nakalabaw og dos puntos sa halftime, 38-36 pinaagi sa paningkamot nilang Dondon Cadungog ug Tin Atillo.

Dali sab hinuon   napatabla sa Airen ug ilang nasakmit ang labaw, 68-67 sa katapusang 36 segundos, apan igo lang silang gipatilaw sa maong labaw tungod kay nakapasulod man si Jun Felicitas aron hatagan ang Best Friends og 70-68 nga labaw sa nahabiling 25 segundos sa duwa.

Si Cadungog maoy nangu sa Best Friends sa iyang 20 puntos, si Felicitas midugang og 17 puntos, samtang sila si Jimmy Carcueva ug Atillo mitampo og 10 puntos matag usa.

Si Ararao mi-iskor og 17 puntos aron pangulohan ang Airen.

Puntos Matag Usa

Best FriEnds (72) - Cadungog 20, Felicitas 17, T. Atillo 10, Carcueva 10, Ciabo 6, Quiroz 2, R. Atillo 2, Brigola 2, Laborte 2, Bacalla 1

Airen (68) - Ararao 17, Celestial 15, Abellaneda 8, Palma 6, Sabandeja 6, Yap 4, Fury 4, Castro 3, Carfox 3, Dela Cerna 2. - Gabby G. Malagar (BANAT NEWS)