BEST basketball clinic gitakda

CEBU, Philippines - Ang BEST (Basketball Efficiency and Scientific Training) basketball clinic nga gipaluyohan sa Milo mopahigayon og duha ka sessions dinhi sa Sugbu karong summer sa managlahing petsa.

Mao kini ang gipahibalo ni BEST Cebu Tournament ug Clinic Director Rico S. Navarro.

Ang unang sesyon himuon gikan sa Marso 30 hangtod sa Abril 4 diha sa Capitol Parish Gym. Ang ikaduhang sesyon pagahimuon sa Mayo 18-23.

Gibahin ang BEST Center program ngadto sa upat ka levels. Ang Level 1 motutok sa dribbling ug ballhandling fundamentals. Ang Level 2 mopunting sa shooting, ang Level 3 alang sa individual defense ug ang Level 4 sa individual offense.

Himuon kini gikan sa alas-8 sa buntag hangtod sa alas-12 sa udto ug mahimo sab sa ala-1-5 sa hapon. Magdepende kini sa level nga ilang na-enrolled.

Ang tanang partisipante mosugod sa Level 1 ug mosaka kini sa mosunod nga clinic.

Ang BEST Center natukod 31 na ka tuig ang nilabay nga gitukod ni coach Nic Jorge. Nakamugna na kini og liboan ka gradwado sukad kini nasugdan. Lakip sa nigradwar mao sila si Enrico Villanueva, Lary Fonacier, Joseph Yeo, Paolo Mendoza, Renren Ritualo, TY Tang, Benjie Paras ug Jun Limpot.

Alang sa dugang mga kasayoran mahimong mokontak sa 516-9036, 0918-939-4846, 0923-3428193 o dili ba e-mail sa [email protected].  (BANAT NEWS)