CEBU, Philippines - Walay kukahadlok nga mipadayag ang kanhi IBF minimumweight champion nga si Muhammad Rachman sa Indonesia nga ang gikatakda niyang away batok ni ALA Stable stalwart Milan Melindo giisip niya nga usa ka "tune-up" alang sa umaabot ug mas daku niya nga away karong summer.
Si Rachman gikatakda nga makigbinukbukay ni Melindo karong Sabado sa eksplosibong double-header nga giulohan og "Judgment at the Waterfront" diha sa Pacific Grand Ballroom sa Waterfront-Cebu City Hotel and Casino sa barangay Lahug, ning siyudad.
Apan ang bisitang si Rachman mitug-an nga kaya kaayo niya si Melindo ug ang iyang gihatagan og gibug-aton mao ang iyang umaabot nga showdown batok sa WBC 105-pound titlist Oleydong Sithsanerchai karong Abril o dili ba sa Mayo sa Thailand.
“Yes, this (fight against Melindo) is only a tune-up,” matud pa ni Rachman pinaagi sa iyang interpreter ug manager Martinez Dos Santos atol sa informal press conference nga gipasiugdahan sa ALA Promotions kagahapon didto sa Patio Isabel. “I am scheduled to fight in Thailand against world champion Oleydong Sithsanerchai this April or May. Win or lose, it will push through so this is just a tune-up fight for me.”
Ang 37-anyos nga si Rachman, kinsa maguwa’g 16 ka tuig ni Melindo, nagkanayon nga ang kasinatian maoy dakung puhonan sa matag away ug mao sab ang iyang gihimong basihanan sa iya unyang pagpukan ni Melindo.
Si Rachman nakahimo na og 73 ka away sa iyang pro career, samtang si Melindo aduna lamang kini 17 ka away. Sa kinatibuk-an, si Rachman naghupot og 62-6-5 record uban ang 31KOs, samtang si Melindo, kinsa maoy reigning WBO Asia-Pacific and WBA Intercontinental minimumweight crown-holder, adunay 17-0, 5KOs.
Sa laing bahin, ang final news conference sa gi-atngan nga boxing extravaganza himuon karong alas-12 sa udto sa Caspian Room sa Waterfront Hotel.
Modugang og bulok sa maong kalihukan mao si ex-IBF Intercontinental super flyweight champion Z ‘The Dream’ Gorres ug si kanhi world minimumweight titlist Roberto ‘Mako’ Leyva.
Sa alas 5:30 sa hapon, silang Rachman ug Leyva mohimo og public preview sa ALA Gym sa Banilad Town Centre. Ang official weigh-in himuon ugma sa alas-11 sa buntag diha sa SM City-Cebu Entertainment Center.
Alang sa ticket reservations, mahimong motawag o text ni Jeana (0928-5057980 or 0928-5215772) ug mahimo sab mokontak sa ALA Promotions Office numero 236-4611. – BANAT NEWS