Managuit, Baltonado, Britania nanghawod sa Darts Open

CEBU, Philippines – Gidominar nila ni Eugene Managuit, Dilay Baltonado ug Kenneth Britania ang three-man classified category sa Cebu City Darts Open 2009 nga gipasiugdahan sa Cebu City Hall Employees Darts Association (CHEDA) didto sa Coon Grill sa Paseo.

Sa maong kadaugan ilang nabulsa ang P4,500 nga ganting salapi.

Miangkon sa ikaduha nga dapit mao sila si Odong Pamatian, Junnix Perez ug Lanie Ganido, kinsa midaog og P2,200, samtang sila si Ronald Dequit, Isma Lumantao ug Jonathan Rubi mibulsa og P1,500 sa ilang pagpahiluna sa ikatulo.

Sa laing bahin, ang tandem nilang Roger Dequit ug Jerome Perales midaog og P3,000 sa ilang pagdominar sa doubles category.

Ang ikaduhang dapit nadaog nilang Etong Badayon ug McRoss Anora, kinsa nakadawat og P1,500, samtang sila si William Encorporado ug Tom Belleza nakaangkon og P1,000 alang sa ikatulong dapit.

Mipakita sab sa iyang katakus si Christopher Daclan diin iyang gidominar ang youth singles event. Iyang nadawat ang P1,000 nga ganting salapi. Si Anthony Nobe mipahiluna sa ikaduha ug iyang naangkon ang P700, samtang si Lucky Daclan mi-okupar sa ikatulo bitbit ang P500 nga ganti.

Ang tulo ka adlaw nga torneyo magsilbeng pangandam alang sa umaabot nga National Darts Federation Championships nga anha gihapon duwaon sa Coon Grill sa nanghinapos nga bahin sa Abril ug sa sayong bahin sa Mayo.

Ang organizers nga gipangulohan ni CHEDA president Bert Colong mapasalamaton ngadto sa Paseo management ug ni Senator Manny Villar sa ilang pagsuporta sa kompetisyon.

Lain pang nagpaluyo naglakip sa Casino Alcohol, Omega Pain Killer, Gastripac, Nature’s Spring Mineral Water, San Miguel Corporation, Eli Car Glass & Aluminum Supply, Roro Transport Services, Wos Health Center, Kirr Construction, Cebu Equipment ‘R Us, Generation Purified Ice, Killer Bee, ABS-CBN ug CCTN-Channel 47. –BANAT NEWS