Kalampusan taliwala sa kalisdanan

Samtang nagtan-aw ko sa programang "Hello Cebu, Maayong Buntag Pinoy" sa INTV-CCTN Channel 47 niadtong miaging buntag, nalingaw ko og maayo sa mga pintok, undanon ug matulon-anon nga mga tubag ni acting Cebu City Mayor Michael 'Mike' L. Rama sa dihang gisukit-sukit nilang program hosts Divine Marcial-Flores ug sa higala nakong si Chris Ligan (nga mi-pinch-hit ni Sir Ricky Rama Poca nga dunay mahinungdanong kalihukan nga gitambongan sa Waterfront Hotel) kabahin sa pipila ka mga politikanhong isyu ilabi sa iyang pamaagi pagpadagan sa dakbayan.

Apan dili ko magtuki og politika kay mura'g way kahumanan kining litanya. Akong ipaambit kaninyo mao ang pamahayag ni Sir Mike nga gawas nakatandog kanako, angayan sab nga panaminan sa atong katilingban. Duna man guy gipadangat nga mensahe si Sir Mike kansang implikasyon kabahin sa nagkakunhod nga moralidad sa uban natong mga kaigsuonan.

Ang akong gipasabot mao ang gisulti ni Sir Mike nga kun siya maoy pabut-on, dili niya paphaon sa hingpit ang 'tigbakay' kay lagi kini kabahin na man sa tradisyon natong mga Pinoy. Apan sa pag-ingon niini, dunay panawagan si Sir Mike ngadto sa tagsa-tagsa ka mga kapitan sa barangay ug uban pang mga hintungdan nga ipahilayo intawon ang pagpahigayon sa maong 'ilegal' nga kalihukan sa mga tagbalay kay dili kini maayong ehemplo ug ingon man aron dili kini makatintal sa mga kabatan-onan paghimo og dautan.

Segun man gud sa obserbasyon ni Sir Mike, liboan ka mga tawo ang magtapok kun dunay tigbakay sa usa ka barangay, apan ang ilang kapilya intawon gilangaw. Buot ipasabot ni Sir Mike nga dunay mga higayon nga gipasulabi pa hinuon sa uban natong mga kaigsuonan ang pagsimba sa 'yawan-ong dapit' kay sa balay sa atong Langitnong Amahan.

Mao nang nakasabot ko sa mensahe ni Sir Mike basi na sab sa personal nakong kasinatian. Duna man guy higayon sa dihang mosimba ko nga ang akong katupad nagsige og text, samtang ang uban nagpunay og tabi ug panaway sa bisan kinsa na lang nga ilang makit-an. Samot nang makalingkod ka atubangan sa naka mini-skirt nga puwerting muboa. Gi-ahak na! Sa mga sinehan sab ini'g tukar na sa nasudnon natong awit matag last full- show, ma-ihap ra ang mamarog. Ang kinabag-an sa mga nanan-aw nagpasinaw sa ilang lubot sa lingkoranan. Pipila lamang kini sa mga timailhan nga nagkahinay na og kahanaw ang pagtamod nato sa gitawag natong mga "moral values." Kuyaw kun sa hingpit ato nang mahikalimtan ang mga maanindot natong mga kinaiya. Dili kini angayan nga mahitabo kay kining maayo natong mga gawi makahatag kanato og lig-ong pundasyon alang sa maayong ugma sa bisan unsang dalan sa kinabuhi nga atong latason.

* * *

Gikan sa pagka-janitor ngadto sa usa ka world boxing champion. Mao kana ang estorya sa kinabuhi ni Donnie 'Ahas' Nietes, ang kasamtangang WBO minimumweight champion. Janitor man gud sa ALA Stable ang unang trababo nga nakaplagan ni Nietes sa iyang pagpanimpad dinhi sa Sugbu sa wala pa magka-interes sa boksing. Apan kay unay lagi sa gym, hinay-hinay nga nahigugma si Nietes sa boxing ug inubanan sa determinasyon, disiplina ug paningkamot, gidawat siya isip miyembro sa gikaintapang ALA Boxing Gym.

Bisan og usa na siya ka world champion duha ka tuig ang milabay, dili gihapon makabagting og kampana ang pangan ni Nietes. Sa uban, dili pa kaayo siya iladong boksidor ug kanunay siyang masapawan kun hisgutan na silang Z Gorres, Boom Boom Bautista, ug AJ Banal.

Hangtud nga mikulit si Nietes og makasaysayanong kadaugan dili pa dugay didto sa Mexico. Dili lalim ang gihimo sa taga Murcia, Negros Occidental. Tiaw mo na nga nanulong siya didto sa makuyaw nga teritoryo sa iyang kontra aron depensahan ang iyang korona. Si Nietes hilomon, apan ang iyang mata nagkayo sa tumang kadasig.

Sa dihang nanukad didto sa Los Angeles, na-delatar pa ang ilang biyahe padung sa Mexico gumikan kay adunay problema sa ilang visa. Ang nakapait kay sila pa ang milukat sa ilang visa para sa Mexico nga trabaho man unta kini sa promoter sa maong away. Klaro nga gilisud-lisud sila. Gani nakatunob sila sa Mexico tulo na lang ka adlaw sa dili pa ang away.

Apan wala magpa-apekto si Nietes niining tanan. Inay gipakita niya ang kalig-on sa iyang mentalidad ug kahait sa iyang abilidad dayon na ngadto sa paglansang og makapakugang nga kalampusan. Iyang gipahawok sa sawog si Erik Ramirez upat ka higayon dayon na ngadto sa pagdepensa sa iyang titulo pinaagi sa unanimous decision nga kadaugan niadtong Domingo didto sa Oaxaca, Mexico.

Dalaygon ug dili mahikalimtan ang nakab-ot nga dungog ni Nietes. Ikaduha lamang siya nga Pinoy nga nakadaog og world title fight didto sa Mexico sunod ni Luisito Espinosa nga kanhi nakadepensa sa iyang WBC featherweight title human pakatulga sa ikaupat nga hugna si Alejandro 'Cobrita' Gonzalez niadtong Marso 1, 1996 didto sa Guadalajara, Jalisco, Mexico.

Way duda nga sa iyang gibuhat nakahatag na og impresyon si Nietes ngadto sa mga nagduha-duha sa iyang abilidad ug wala mobilib sa iyang katakus. Dili ikalimod nga nakaangkon na sab siya og respeto nga taud-taod na sab nga gihikaw kaniya sa komunidad sa boksing bisan gani dinhi mismo sa atong tugkaran. Ang labing tam-is nga sud-ongon kay nakatkat ni Nietes ang hagdanan sa kalampusan bisan pa sa mga kalisdanan nga iyang naagian. – BANAT NEWS