USPF nakalingkawas sa SWU

CEBU, Philippines - Nakalingkawas ang CDO Idol Cheese Hotdog/University of Southern Philippines Foundation (USPF) human sa lima ka sets sa ilang kulbahinam nga duwa batok sa R. Lapid's Chicharon/Southwestern University (SWU) aron pag-angkon sa kinatas-ang bahin sa CESAFI Partner's Cup volleyball tournament kagahapon sa USC-main gym.

Gipukan sa CDO/USPF ni coach Jordan Paca ang R. Lapid's/SWU, 23-25, 25-16, 19-25, 25-23, 15-7 aron haruson ang unom ka daog sa elimination round.

Sa laing duwa, ang Lion Tiger Aerosol/University of San Carlos (USC) nakakuha og lingkoranan sa semifinal pinaagi sa pagpilde sa Virginia Premium Corned Beef/Cebu Doctors' University (CDU) sud sa tulo ka sets, 25-14, 25-20, 25-18.

Ang kadaugan sa Lion Tiger/USC gipangulohan sa ilang team captain nga si Jerymie Montalvo, uban nila ni Chona Gesulga, Anna Krist Capinpin, Niña Irish Cortes ug Mary Daylin Escudero.

Karong adlawa tigian ang crossover semifinals diin ang USPF moharong sa USC sa alas-8 sa buntag, samtang ang SWU makigsangka batok sa Ave Maria Sanctuary Park/University of San Jose-Recoletos (USJ-R) alang sa ikaduhang duwa nga gikatakda sa alas-10 sa buntag.

Ang mga mananaog maoy magsangka alang sa kampiyonato karong hapon. – BANAT NEWS