USPF vs. SWU sa Partner's Cup volleyball tournament

CEBU, Philippines - Hinapakay sa sakto ang gipasalig sa CDO Idol Cheese Hotdog/University of Southern Philippines Foundation (USPF) belles sa ilang harungon ang mas lig-ong kontender R. Lapid's Chicharon/Southwestern University (SWU) karong adlawa sa Cebu Schools Athletic Foundation, Inc. (CESAFI) Partner's Cup volleyball tournament diha sa University of San Carlos (USC)-main gym.

Ang CDO/USPF ni coach Jordan Paca nga nikabkab og bulawang medalya sa Private Schools Athletic Association (PRISAA) Regional Games sa miaging semana didto sa Dumaguete City, nagpanikad na nga mopiog sa walay pildeng koponan SWU.

Sa gihapon, ang reigning CESAFI champion magsalig sa ilang star player nga si Ericka Camille Verano, uban nilang Jennielou Fernn Villeguez, Apple Saraum, Dianne Navaja, Jovi Abil, Honeylyn Ybarita ug Amor Pepito.

Dili sab hinuon sayon alang sa USPF kay ang SWU ni coach Joerem Yu dili motugot nga yanohon lang ang iyang mga batos sa ilang mga kaatbang.

Ang R. Lapid's Chicharon/SWU may ilang sab nga masaarong mga magduduwa nga gipangulohan nilang reigning CESAFI beach volley champs Danika Yolanda Gendrauli ug Lorie May Layno.

Si Danalie Baquiro, kinsa nakaangkon og injury niadtong miaging semana gipaabot sab nga moduwa sa SWU, uban nilang Elizabeth Emnace, Rhea Loayon ug Aureen Pero.

Sa laing bahin, ang Ave Maria Sanctuary Park/University of San Jose-Recoletos (USJ-R) nakaangkon na og luna sa semifinal human gipilde ang Lion Tiger Aerosol/University of San Carlos (USC) sa miaging semana.

Ang USC ni Eugene de la Cerna kinahanglang modaog batok sa Virginia Premium Corned Beef/Cebu Doctors' University (CDU) aron malamdagan pa ang ilang kampanya alang sa semis. – BANAT NEWS