Letran spikers nanalasa din

MANILA, Philippines - Kasabay ng paghataw ng Luzon back-to-back champions Far Eastern University ng ikalawang sunod na panalo nito, hindi rin nagpahuli ang NCAA titlist Colegio de San Juan de Letran.

Sa likod ng tambalan nina Joseph Erickson Ramos at Eden Canlas, iginupo ng Knights sina Gabriel Usman at Marion James Roa ng Philippine Christian University Dolphins, 21-17, 21-14, para sa kanilang pangatlong dikit na ratsada sa Luzon eliminations ng 2009 Nestea Fit Beach Volley National Circuit kahapon sa SM Mall of Asia Bay Area.

Bago ang PCU, binigo nila sa finals ng NCAA beach volleyball tournament, tinalo muna ng Letran ang San Beda College, 21-15, 21-15, at ang University of Perpetual Help-Dalta System, 21-13, 21-15, noong Miyerkules para ilista ang kanilang 3-0 rekord kasunod ang 2-0 ng FEU.

“Hopefully, magtuluy-tuloy pa itong magandang performance namin,” sabi ni Canlas sa kampanya ng Knights, nagkampeon sa national finals ng Nestea beach volley noong 2000.

Nauna rito, pinayukod nina Tamaraws Josh Alcarde at Jan Berlin Paglinawan sina Rene Ali at Fernando Amlain ng Lyceum of the Philippines-Batangas, 21-16, 21-10, sa torneong pinagharian ng Foundation University noong nakaraang taon sa Boracay.

Ang top three teams mula sa Luzon elims ay aabante sa national championships sa Boracay sa Mayo 6-9 kung saan nakalatag ang top prize P100,000 para sa magkakampeon sa men’s at women’s division.

 Sa women’s side, kapwa pinitas ng Letran, University of the East at University of the Cordilleras ang kanilang 2-1 baraha sa labanang pinagreynahan ng Southwestern University noong 2008.

Binigo nina Marinelle Carolino at Keeshia Andaya ng Letran sina Nicole Dela Cruz at Karissa Villablanca ng San Beda-Alabang, 21-15, 23-25, 15-5, habang iginupo nina Ginaflor Alanguilan at Mary Abigail Escandor ng UE sina Pauleen May Genido at Southlyn Ramos ng University of the Philippines, 21-7, 21-15, at tinalo nina Cindy Benitez at Michelle Remo ng UC sina Maria Krissian Tsuchiya at Tamiya Dawn Joseph ng St. Louis University, 21-14, 21-11. (Russell Cadayona)