Kun ikaw usa sa mga magdudula nga gustong mopalambo sa hingpit sa imong abilidad sa pagdula og bilyar, kinahanglan nga imong sundon ang hustong proseso sa pagbansay. Ang hustong proseso nagkinahanglan sa pagsagop sa hustong paagi nga moresulta ngadto sa hustong paghinog sa katakus sa usa ka magdudula.
Ang pagpalambo sa abilidad sa dula nagkinahanglan og pailob. Kun wala ang pailob, posible gayod nga pul-an ka sa makanunayon nga pagtuman sa naandan nga proseso sa pagbansay. Posibleng dili makalahutay ang magdudula sa makuting proseso sa pagbansay-bansay sa iyang abilidad sa dula.
Dugang sa ato nang nahisgutan, ang pagpalambo sa abilidad sa pagdula og bilyar nagkinahanglan og disiplina. Gikinahanglan dinhi ang disiplina sa hunahuna ug kabubut-on. Kun wala ang disiplina, posibleng dili maumol sa maayong porma ang kinaiya sa magdudula isip usa ka sportsman.
Kuti ang pagbansay. Dili man gud makuha sa usa lang ka practice session ang kahingpitan nga gitinguha sa magdudula. Usa kini ka makuting proseso maong gikinahanglan ang pailob ug disiplina. Walay laktoranan ngadto sa kahipnoan ug kahingpitan mao nga dili gyud angay manglaktod kay moresulta lang kini og kakawangan.
Si Ashok Kumar, tagsulat sa librong Snooker and Billiards, miingon: "You will have to practice more as well as play more. In that case you really will have to be ruthless with yourself in analyzing your game. Like stripping down a car prior to rebuilding it, you will have to break the game down into its many component parts and work tirelessly at them. There is no other way of assembling a really formidable game, a game that will allow you to hold your own and win against increasingly skilled opposition. There is no short cuts to excellence."
Tinuod ang pamahayag ni Kumar. Ang gikinahanglan sa magdudula mao ang dugang pagbansay ug dugang pagdula aron pagmanso sa iyang kaugalingong katakus. Walay laktoranan ngadto sa kahipnoan busa kinahanglang moagi gyud sa naandan nga proseso.
Bansay, bansay ug bansay. Dula, dula ug dula! Kini ang labing praktikal nga paagi sa pagbaid sa abilidad sa magdudula.
* * *
(Mga sugyot ug pakisayod? Text sa 0910-8105522). – BANAT NEWS