USPF, SWU 5-0 na sa Partner's Cup

CEBU, Philippines – Lab-as pa gikan mikabkab og bulawan sa Private Schools Athletic Association (PRISAA) Regional Games didto sa Dumaguete City, ang CDO Idol Cheese Hotdog/University of Southern Philippines Foundation (USPF) miposte dayon og daog sa Cebu Schools Athletic Foundation, Inc. (CESAFI) Partner's Cup volleyball tournament niadtong Domingo didto sa University of San Carlos (USC) main gym.

Gipukan sa USPF ni coach Jordan Paca ang Virginia Premium Corned Beef/Cebu Doctor's University (CDU) ug ang Metro Gaisano/University of the Visayas (UV) aron pabiling mag-una sa overall nga adunay 5-0 nga baraha.

Ang CESAFI champion mibuntog sa CDU, 25-14, 25-13, 25-20 pinaagi sa paggiya ni star player Ericka Camille Verano uban nilang Jennielou Fernn Villeguez, Apple Saraum, Dianne Navaja, Jovi Abil, Honeylyn Ybarita ug Amor Pepito.

Gipahamtangan sab sa USPF ang walay daog-daog nga UV sa tulo ka sets, 25-20, 25-14, 25-10.

Nakabaton sab og laing pilde ang UV dihang gitiwasan kini sa R. Lapid's Chicharon/Southwestern University (SWU), 15-25, 17-25, 20-25.

Sa maong kadaugan, ang SWU nakigsawo karon sa liderato uban sa USPF nga wala sab makatilaw og pilde sa lima ka duwa.

Ang kadaugan sa SWU gipangulohan nilang reigning CESAFI beach volley champion Danika Yolanda Gendrauli ug Lorie May Layno. Nakakuha sab sila og maayong suporta gikan nilang Elizabeth Emnace, Rhea Loayon, Aureen Pero ug Danalie Baquiro.

Sa laing bahin, ang Ave Maria Sanctuary Park/University of San Jose-Recoletos (USJ-R) ni Cebu Sports Hall of Famer coach Grace Antigua nakaangkon og luna sa semis human gipilde ang Lion Tiger Aerosol/Univeristy of San Carlos (USC) sa upat ka sets, 25-18, 21-25, 25-18, 31-29.

Sa maong kapildihan, ang USC kinahanglan modaog sa ilang duwa batok sa CDU sunod semana aron mahayagan pa ang ilang kampanya sa semis. –BANAT NEWS