Coon Grill dartfest gitakda Marso 6-8

CEBU, Philippines - Hapit tanang mga kahugpongan nga sakop sa Cebu Darts Federation mipadayag sa ilang intensiyon nga mosalmot sa Coon Grill Cebu City Dart Open 2009 nga gikatakda karong Marso 6-8 diha sa Coon Grill sa Paseo Panagdait sa barangay Mabolo, ning siyudad.

Ang maong kalihukan nga gipasiugdahan sa City Hall Employees Darts Association (CHEDA) ubos sa ilang presidente nga si Bert Colong, Jr. magsilbeng pagpangandam alang sa umaabot nga Cebu City National Darts Championships nga gikatakda sa katapusang semana sa Abril.

Mga koponan nga mosalmot   naglakip sa Ram Darts gikan sa Ramos, Cabreros Darters Club, Tom 80 gikan sa Zapatera, Terton Craft, Lola East, MCWD Darts Club, VECO Darts Club, SWU Darts Association, UC Darts Association ug ALA-Sikatuna Darts Club.

Ang nahisgutang mga koponan magtige sa classified doubles, classified 3-man team, open youth ug open singles.

Matag partisipante aduna kini registration fee nga P135.00.

Sugdan ang registration karong Marso 6 sa alas-6 sa gabii diha sa Coon Grill.

Ang Coon Grill dartfest nga gihatagan og pagtugot sa National Darts Federation (NDF) gipaluyohan sab sa Camella Homes ni Senator Manny Villar. – BANAT NEWS