Gorres, Milendo moharong sa ex-world champs

CEBU, Philippines - Mokatkat na sab og balik ibabaw sa ring ang mga bitoon sa ALA Stable nga si Z 'The Dream' Gorres ug si WBO Asia-Pacific minimumweight king Milan Melindo ug ilang sangkaon ang mga kanhi world champions sa ipahigayong "Judgement at the Waterfront" karong Marso 14 diha sa Pacific Grand Ballroom sa Waterfront-Cebu City Hotel and Casino sa Brgy. Lahug, ning siyudad.

Ang maong boxing extravaganza gipasiugdahan sa ALA Promotions uban sa higanteng TV network ABS-CBN.

Si Gorres (28-2-2, 15KOs) mo-away sa labing unang higayon ubos sa bantamweight division batok ni ex-IBF minimumweight titlist Roberto Carlos 'Mako' Leyva (25-8-1, 20KOs) sa Mexico alang sa 12 ka hugna nga pinaksitay sa WBO Oriental 118-pound crown, samtang si Melindo (17-0, 5KOs) makigsinukmagay batok ni IBF 105-pound ruler Muhammad Rachman (62-6-5, 31KOs) sa Indonesia sa ilang 10-round non-title fight.

"This is a big test for him (Gorres) fighting a former world champion," matud pa ni ALA Promotions president Michael P. Aldeguer atol sa press conference kagahapon didto sa Sugbahan Restaurant sa A.S. Fortuna Street sa Brgy. Banilad, Mandaue City. "This is gonna be a big night for both of them. It’s judgment day for them."

Mipadayag si Aldeguer nga ang 26-anyos nga si Gorres mopakita'g maayong labok isip bantamweight human kini mapakyas sa iyang kampanya sa kalibotanong titulo sa super flyweight.

"Gorres will be stronger at 118 [pounds]. We believe at this weight he will be very comfortable," matud pa ni Aldeguer segun sa pamahayag nga gipalanog ni Gorres.

Sa laing bahin, si Aldeguer nabalaka sa sangka ni Melindo tungod kay ang kontra taas na kaayo'g kasinatian ug mas maguwang pa'g 17 ka tuig

Apan si Melindo wala malisang ni Rachman, kinsa nakaabot na'g 73 ka away batok iyang 17 ka away.

"Rachmann is a good fighter and a veteran, but I’m not afraid of him. I’m very confident that I will win," matud pa sa 21-anyos nga si Melindo, kinsa maoy WBO No. 1, WBA No. 4, WBC No. 6 ug IBF No. 11.

Matud pa ni Aldeguer, kun magmalampuson sila si Gorres ug Melindo, iya kining paawayon didto sa Estados Unidos

Sa undercards, laing batos sa ALA nga si Michael 'Sunday Punch' Domingo makigtakos ni Monico Laurente sa Parañaque City-based Elorde Stable, samtang si James Bacon nagtinguha nga makabawos sa ilang rematch ni William Jorge sa Leolets Stable sa Cagayan de Oro City.

Sa lain pa nga mga away, si Joseph Von Miñoza sa Talamban, Cebu City makigsinukliay og kumo batok ni Rufino Manta sa Tagbilaran, Marjohn Makahilig sa Kalibo, Aklan makighamag ni Marlon Ariesga sa Tagbilaran, si Ricardo Campana sa Ermita, Cebu City makigbatok ni Jherpol Valero sa Fil-Aus Gym sa Mandaue City ug si Jomar Cordinillo sa Tagbilaran makigsangka batok ni Ricky Nuñez sa Fil-Aus Gym.

Sa laing bahin, ang mga tiket alang sa eksplosibong aksiyon mahimo nang mapalit sugod ugma sa nagkadaiyang outlets: ALA Promotions Office (236-4611), ALA Gym-BTC (416-2011), Islands Souvenirs boutique-Ayala (231-2581), USA Sports-Ayala (232-1854) ug Gaisano Mactan Kiosk.

Ang mga tiket nagkantidad og P250 sa balcony, P350 sa ballroom, P550 sa ringside, P1,000 sa VIP 3rd Row, P1,250 sa VIP 2nd Row ug P1,500 sa VIP 1st Row.

Alang sa ticket reservations, mahimong mokontak ni Jeana sa   0928-5057980 ug 0928-5215772.    (BANAT NEWS)