Pacquiao motambong sa SAC awards

CEBU, Philippines - Si Filipino boxing hero Manny Pacquiao maoy mangulo sa mga honorees, kinsa pasidunggan karong gabii sa 27th Sportswriters Association of Cebu-San Miguel Corporation (SAC-SMC) All-Cebu Sports Awards diha sa Casino Español.

Sugdan ang dakung kalihukan sa alas-7 sa gabii uban ni Bacolod City Rep. ug Philippine Olympic Committee (POC) chairman Monico O. Puentevella isip pinasidunggang dinapit.

Si Pacquiao kinsa gibayaw isip usa sa all-time boxing greats, hatagan og Lifetime Achievement Award tungod sa iyang mga kalampusan sa pamuksing.

Ang lumad nga taga General Santos nga si Pacquiao mikulit sa iyang ngan sa kasaysayan isip usa sa pipila nga boksidor nga nidaog og tulo ka away sa managlahing weight divisions sud lamang sa usa ka tuig.

Napanalipdan ni Pacquiao ang iyang WBC super featherweight title pinaagi sa split decision nga kadaugan batok ni Juan Manuel Marquez sa ilang kontrobersiyal nga rematch. Iya sab nga nalangkat ang WBC lightweight crown gikan sa mga kamot ni David Diaz pinaagi sa makalisang nga ninth round knockout ug dayon mikatkat og mas taas nga timbang aron harungon si Oscar de la Hoya, kinsa iyang gipaundang sa ikasiyam nga round.

Uban ni Pacquiao nga hatagan og dakung pasidungog mao si football organizer Jonathan 'Maxi' Maximo, wushu philantrophist Francis Onglatco ug Fr. Vicente 'Vic' L. Uy, SVD, ang unang Philippine Sports Commissioner (PSC) nga gikan sa Sugbu.

Si Maximo modawat sa "Sportsman of the Year" award, si Onglatco maoy makadawat sa ORLACSAN (Orlando C. Sanchez) Memorial Award, samtang si Uy maoy napilian ni SAC president John Pages isip "Presidential Awardee."

Sila si Maximo, Onglatco ug Fr. Uy gipasidunggan tungod sa ilang mga kaayohan nga natampo aron mapalambo ang sports sa Cebu.

Lain pang modawat og award tungod sa ilang maayong performance sa nagkalain-laing sporting events sa miaging tuig mao sila si Leizsl Lumindas-Getaruelas (athletics), Gregory Slaughter ug M. Lhuillier Kwarta Padala-Cebu Niños (basketball), Janelle Tabio ug Floria Gutierrez (beach volley), Kimberly Lao (bowling), Donnie Nietes ug Gerry Peñalosa (pro boxing), Joseph Sanchez ug Kim Steven Yap (chess), Annabelle ug Joel Madera (dancesport), Don Bosco Technology Center (football), Irina Gabasa (golf), Tracy Badonio (gymnastics), Alford Marimon (judo), Juan Antonio Carcel (karting), Vince Marc Tabotabo (lawn tennis), Teodoro Martus (scrabble), Cris Panes (shooting), Loren Dale Echavez (swimming), Michael Motel (table tennis) ug Kelly Kay Rojas (weightlifting).

Isip major awardees, pulos sila mga kandidato alang sa prestihiyusong "Athlete of the Year" award.

Ang paralympian nga si Arnold Balais ituboy isip SAC Hall of Fame tungod sa iyang nagsunod-sunod nga mga kalampusan.

Modawat og special citations mao sila si Lindley Fran Navaja (athletics) Doce Pares ni Grandmasters Dionisio 'Dionnie' Cañete ug Ciriaco 'Noy Cacoy' Cañete (arnis), Jusabelle Brillo (beach volley), Jomar Jumapao (bowling), Milan Milendo (pro boxing), Charlea Lagaras (dancesport), Gio Gandiongco (golf), Sidney Metante (karatedo), Paco Rodriguez (karting), Sally Mae Siso (lawn tennis), Seigfred Ornopia ug Jon-Jon Adlawan (motocross), Yaw-Yan Cebu ArDigma Martial Arts Federation Inc. ni Master Benigno 'Ekin' R. Caniga, Jr. ug Universal Reality Combat Challenge (URCC) ni Renault Lao (mixed martial arts), Angelic Lado (weightlifting), Luis Ansag (wrestling) ug Rachel Ng. – BANAT NEWS