Pacquiao adunay bag-ong game plan

CEBU, Philippines - Gibutyag sa trainer ni Manny Pacquiao nga si Freddie Roach nga lahi nga game plan ang ilang gamiton batok ni Ricky Hatton kompara sa ilang gigamit atol sa away niini batok ni Oscar De la

Hoya.

Sumala pa ni Roach nga mas bata ug mas lagsik si Hatton   itandi sa legendary boxing icon nga si De la Hoya, kinsa gipaundang ni Pacquiao sa ikasiyam nga hugna niadtong Disyembre 6 didto sa Las Vegas, Nevada.

Si Roach nagkanayon nga gipangandaman na nila ang maong away batok sa British champion nga si Hatton.

Si Roach mokuha og paspas ug agresibo nga mga sparmate nga iyang i-atbang ngadto ni Pacman. Gitino ni Roach nga mas nakapabor si Pacquiao sa kapaspas ug kakusog batok ni Hatton.

Si Roach wala mahimuot sa gipamahayag sa trainer ni Hatton nga si Lee Beard.

Sa nasayran, si Beard nagkanayon nga nakakita na sila og buslot aron mapilde si Pacquiao.

Misumbalik si Roach nga si Hatton ang angayan magbantay kang Pacquiao.

Sa laing bahin, gihunong una ang US promotional tour sa Pacquiao-Hatton bout aron hatagan ang duha ka boksidor og panahon sa pag-ensayo. – BANAT NEWS