Getaruelas, Lopez milampos sa HK Marathon

CEBU, Philippines - Mga sakop sa Atan Guardo Running Team nga sila si Leizl Lumindas-Getaruelas ug Mendel Lopez wala magpabiya atol sa gipahigayong Standard Chartered Hong Kong Marathon 2009 niadtong Domingo.

Gikan sa ikaupat nga dapit sa 10K sa miaging tuig, ang multi-titled nga si Getaruelas nalandig karon sa ikatulo sa women's 21K category sa oras 1:32.30. Sa men's division, si Lopez mitapos sa ikaupat sa overall sa oras 1:15.57.

Ang team leader ug tinahod nga sportsman Jonathan 'Atan' L. Guardo wala sab magpapiri ug nakalahutay pagdagan sa 42-K Full Marathon sud sa lima ka oras ug 35 minutos.

Ang runner partner ni Guardo nga si Tinago barangay councilor Joel Garganera nakalahutay sab og dagan sud sa lima ka oras ug 33 segundos, samtang si Arnold Palma milatas sa finish line sud sa lima ka oras ug 23 minutos.

Si barangay Tisa no. 1 councilor Jeson L. Guardo mihunong sa kilometer 37, samtang si Sambag I barangay captain Jerry L. Guardo, ABS-CBN newscaster Haidee Acuña ug The Freeman sports columnist Raffy T. Uytiepo miundang sa kilometer 38.

Ang magtutudlo sa Cebu Institute of Technology (CIT) nga si Alan Delantar miundang sab sa kilometer 15, samtang ang bise presidente sa Uniherb Philippines nga si Edwin Ratilla ug Genito Guardo nakatapos og dagan sa 10K category.

Ang Atan Guardo runners gipaluyohan sa Uniherb Philippines, usa sa nag-unang health companies sa nasud nga tiggama sa naila na kaayong food supplements sama sa Arthro, Kidneycare, Diabet, Heartvit, Eyeberry ug Athan.

Kapin sa 50,000 runners gikan sa nagkalain-laing suok sa kalibotan ang nisalmot ning tinuig nga lumba nga gipasiugdahan sa Hong Kong Amateur Athletic Association (HKAAA) ug sa Standard Chartered Hong Kong Marathon Organizing Committee. – BANAT NEWS