UV Lancers milubong sa USJ-R Jaguars

CEBU, Philippines - Wala makasinati og gamay'ng kahasol ang pagbalik og duwa ni 6-foot-11 star center Greg Slaughter sa Prime Asia/UV Green Lancers kinsa yano kaayong milubong sa Ave Maria Sanctuary Park/USJ-R Jaguars, 60-46 sa 3rd CESAFI Partner's Cup niadtong Martes sa gabii diha sa Cebu Coliseum.

Lab-as pa gikan sa ilang kapildihan batok sa Enervon-C/UC Webmasters niadtong miaging semana, ang UV Lancers pungtanon kaayong mikunis-kunis sa Jaguars pinaagi sa pagpauwan og mga puntos sa sayong bahin sa third period.

Ang Jaguars wala pa sab mahuwasi sa ilang kabungog human mapilde sa ilang bugno batok sa CDO Idol/USPF Panthers.

Human magtabla, 22-all sa oras nga 4:04 sa second period pinaagi sa lay-up ni Edmar Pateño, kalit nga mipabuhagay og nagpungasi nga puntos ang Lancers ug wala nila papuntosa ang Jaguars sud sa sayes minutos aron pagbaton og 21 puntos nga labaw, 45-24 pinaagi sa perimeter shot ni Slaughter.

Gitubag ni Edwin Bibera ang kahilom sa Jaguars pinaagi sa iyang three-point play, 27-45 sa nahabiling 3:22 sa third period, apan wala kini makahulga sa Lancers, kay ang UV milunod man og 20 puntos batok sa otso puntos nga nakuha sa USJ-R.

Si Slaughter, kinsa mihimo og duha ka dunks, mi-iskor lang og siyete puntos.

Si Edrian Lao kinsa maoy nagsige'g pamupo og iskor maoy nangulo sa Lancers sa iyang 12 puntos, samtang sila si Ritchum Dennison ug Harold Cincoflores nagkumboya og 17 puntos.

Ang Lancers nagbitbit karon og 2-2 win-loss record ug nagtabla kini uban sa CDO Idol/USPF Panthers.

Sila si Armand Ponce ug Ranulfo Malinao mibugha og 12 puntos matag usa alang sa Jaguars nga mitiurok na karon ngadto sa ika-unom nga dapit sa ilang 1-3 nga baraha.

Puntos Matag Usa

Prime Asia/UV (60) - Lao 12, Dennison 9, Cincoflores 8, Slaughter 7, Cabahug 6, Mercader 6, Sendrijas 6, Olivares 4, Lasala 2

Ave Maria/USJ-R (46) - Ponce 12, Malinao 12, Bibera 9, Llera 3, Delfino 2, Amores 2, Villaver 2, Duran 2, Pateño. – BANAT NEWS