Pimentel Brokers gibirahan sa Assessment Division

CEBU, Philippines - Nagbuntaog na ang Assessment Division ngadto sa final round sa 35-below division human ilang girapido ang Pimentel Brokers, 90-73 sa 14th District Collector's Cup basketball tournament didto sa Don Vicente Sotto Memorial Sports Complex sa Brgy. Punta Princesa.

 Dili unta malubong og maayo ang Pimentel apan gikuhaan sila’g 15 puntos agi'g silot tungod kay gamay ra ang mga players nga mitungha sa maong duwa.

Ang kanhi SIT Baby Skyblazer nga si Adrian Laborte, kinsa mipabuto og 22 puntos maoy nangulo sa Assessment, kinsa nahimutang karon sa ikaduhang puwesto sunod sa Amancia Brokers nga adunay 5-1.

Ang barangay councilor sa Pajo sa Lapu-Lapu City nga si Alex San Pablo, kinsa mibahog og 28 puntos mao sab ang nangulo sa natagak na nga Pimentel sa ilang 2-5 nga baraha.

Sa 35-above division, ang Cebu-Customs United Personeros Association (C-CUPA) mi-iskor og 70-69 nga upset batok sa MJDL Brokers nga maoy naghatag nila'g kahigayonang moabante sa finals.

Si Ronald Gasol maoy nahimong bayani sa maong kadaugan human niya mapasulod ang iyang tirada sa katapusang pito ka segundos.

Upat ka C-CUPA players ang mi-iskor og double figures nga gipangulohan ni Edgar Sepe sa iyang 16 puntos. Upat sab ka players sa MJDL ang mirehistro og double digits nga gipangulohan nila ni James Jordan ug Noel Medalle kinsa parehong mi-iskor og 12 puntos.

Ang kadaugan naghatag sa C-CUPA og 4-2 nga baraha, samtang ang MJDL midailos ngadto sa 3-3 nga baraha.

Sa sayo pa, ang Enforcement Security Service (ESS) ni team captain Jingjing Rama midaog pinaagi sa forfeiture batok sa Port Operations Division (POD).

Ang C-CUPA kinahanglang modaog batok sa ESS karong gabii aron maangkon ang katungod sa pakigharong sa Mactan Hotmen (6-0) sa finals nga gikatakda sa Pebrero 23.

Puntos Matag Usa

Unang duwa:(35 years above)

C-CUPA (70) - Sepe 16, Estrada 15, Palad 11, Sigue 11, Gasol 7, Martelino 6, Ebrada 2, Solidario 2

MJDL (69) - Jordan 12, Medalle 12, Lambayan 10, Nacario 10, Martinez 9, Logarta 4, Badon 4, Nioda 4, Dacumos 2, Lopez 2

Ikaduhang duwa:(35 years below)

Assessment (90) - Laborte 22, D. Enriquez 11, Cadungog 9, Pianyar 8, Trinidad 7, Rollon 6, Enriquez 6, Perez 6, Francia 5, Arreglo 3, Cañete 2

Pimentel (73) - San Pablo 28, Villa 17, Arong 7, Manlosa 6, Villaraza 6, Largosa 3, Bensi 2, Palero 2, Rosel 2. – BANAT NEWS