Cebu City Rugby Football Club duwa na

CEBU – Sugdan na sa Cebu City Rugby Football Club ang una sa dose ka “Dragons Rugby Challenge Cup 2009” matches karong alas-2 sa hapon diha sa bag-ong Aboitiz sports field.

Ang maong torneyo usa ka monthly series, diin ang Cebu Dragons mohagit sa ilang lokal nga mga karibal Low Flying Dragons.

Ang Low Flying Dragons kasagaran gibitoonan sa mga hanas na kaayong langyaw’ng mga magduduwa sama nilang Damien Allison, general manager sa Gustavian Restaurant. Si Allison, kinsa nakaduwa sa Philippine 7’s rugby team sa Sri Lanka, suportado ni kanhi Tongan Rugby League international player nga si Hola Ikatau.

Samtang ang Cebu Dragons pangulohan ni five-time Philippine national player Noel Flowers. Si Flowers maoy mangulo sa Cebuano squad alang sa ilang second Rugby Challenge Championship.

Sa milabay nga katuigan,ang Cebu Dragons nakaugmad na og mga local   Cebuano talents ug adunay 13 ka players nga maoy morepresenta sa Philippine National Rugby Team sa men’s senior ug junior level.

Tumong sa Cebu City Rugby Fooball Club mao ang pagpalambo sa paugnat sa kusog nga rugby sa Visayas region ug tuyo sab niini nga himuon ang Sugbu nga mahimong bantugang Rugby touring destination sa South East Asia. – BANAT NEWS