CCC-CSD midaog

CEBU – Gipakita ni Aldrin Ocañada nga aduna pa gihapon siya’y ikabuga dihang miburak kini og 24 puntos diin ang host Carmen Copper Corporation-Construction Services Department (CCC-CSD) Builders milubong sa ACN/Binglens, 91-76 sa ilang exhibition game niadtong miaging gabii didto sa CCC Recreation Center sa barangay Lutopan, dakbayan sa Toledo.

Human misipyat sa iyang unang duha ka itsa, gibawi dayon ni Ocañada ang iyang sayop pinaagi sa paglansang og 3-point shot sa tunga-tungang bahin sa first quarter. Sukad niadto wala na magpabangbang si Ocañada hinungdan ang Binglens nalubong og 20 puntos sa iskor nga 42-22 sa second quarter.

Samtang nagposaposa ang mga tirada sa Builders sa gawas, yano sab nga namunit og puntos sila si Danny delos Santos ug Franklin Nailon sa ilawom. Daku sab og natabang si Michael Sereño, kinsa maoy nakigtambayayong nilang Raul Redulosa ug Jared Kane Abatayo batok sa mga sinaligan sa Binglens nga sila si Ope Abellana, Reggie Licanda ug Roebucks Abella.

Halos tanang magduduwa gikan sa Builders ni coach Boboy Cal ang mitampo og iskor uban ni De los Santos, kinsa miamot og 12 puntos ug   Sereño nga mipuno og 11 puntos. 

Mihulga ang Binglens pinaagi sa paglusad og 7-0 nga rally nga gipangulohan ni Rey dela Victoria, kinsa mipasulod og   unom ka sunod-sunod nga puntos, apan wala kini makatupong sa lawom nga labaw ug ila lang kining nakan-an ngadto sa 13 puntos, 29-42 sa ulahing bahin sa second quarter.

Bugtong konsuylo sa Binglens mao ang pagkitkit sa labaw ngadto na lang sa sayes puntos, 67-73 human sa tira ni De la Victoria sa final canto.

Si Michael Almonte maoy nangulo sa Binglens ni team owner Allan C. Nazareno ug coach Ervie Diola sa iyang 21 puntos, si Dela Victoria midugang og 14 puntos ug si Abellana miabuno og 13 puntos.

Sa preliminary game, ang bisitang Toledo Legislators mipukan sa host CCC Staff sa iskor nga 88-83.

Ang duwa sa CCC ug ACN Binglens didto sa Lutopan nagmalampuson pinaagi sa paningkamot ni team consultant Romy Cal, ang kanhi champion coach sa CIT Wildkittens nga gipangulohan ni ex-pro Gilbert Demape sa ulahing bahin sa 1990.

Ang maong duwa gipaluyohan sab sa Our Lady of Mt. Carmel Parish ubos sa ilang presidente nga si Tessie Cal.

PUNTOS MATAG USA

Unang duwa:

Toledo Legislators (88) - Panugan 23, Canoy 22, Repollo 14, Iwayan 14, Borja 5, Labra 4, Zambo 2, Alimes 2, Tablado 2

CCC Staff (83) - Formentera 24, Donaire 24, Manalili 7, K. Cal 5, Mahinay 5, Amante 4, Chagas 4, Sayson 4, Moniva 2, Abalde 2, Caña 2

Ikaduhang duwa:

CCC-CSD (91) - Ocañada 24, Delos Santos 12, Sereño 11, Nailon 9, Sayson 8, Abatayo 8, Arnado 6, Redulosa 4, Mangyao 4, Maspiñas 3, Montalbo 2

ACN/Binglens (76) - Almonte 21, Dela Victoria 14, Abellana 13, Canceran 8, Delantes 6, Licanda 6, Tagapan 5, Abelong 3  – BANAT NEWS