Amancia Brokers Pabiling nag-una

Cebu - Pabiling naghupot sa liderato ang Amancia Brokers human makabawos batok sa MJDL Brokers, 72-68 sa 35-below division sa nagpadayong 14th District Collector’s Cup niadtong Miyerkules sa gabii didto sa Mandaue City Cultural and Sports Complex.

Ang Amancia Brokers nagkupot karon og 5-1, samtang ang MJDL nidailos sa   3-3 nga baraha.

Si Freddie Niñel maoy nangulo sa Amancia pinaagi sa iyang 22 puntos. Nakakuha sab siya og suporta gikan nilang Gilbert Giducos ug Biboy Potencioso kinsa mitampo og 16 ug 13 puntos.

Si Baeng Medalle, kinsa mipasulod sa tanang lima niya ka three-point maoy nangulo sa MJDL sa iyang 15 puntos, samtang si Danny Infantado midugang og 14 puntos sa maong kapildihan.

Sa duwa sa 35-above division, ang Mactan Hotmen ni team owner Bingo Matugas ug coach Dacky Ugay miposte sa ilang ikaunom nga sunod-sunod nga kadaugan dihang ilang gibanatan ang District Collector’s Office sa iskor nga 111-68, samtang ang Office of Commissioner (O-COM) milampurnas sa Enforcement Security Service, 66-51.

Ang District Collector ni coach Atty. Paul Alcazaren nagbitbit og 2-5, apan makahimo pa kini pag-abante sa sunod nga hugna depende sa resulta sa duwa sa ubang teams ilabi na kay natagak na ang CCBI ug C-CUPA.

Ang O-Com adunay 4-2 nga baraha ug nahimutang sa ikaduhang dapit, samtang ang ESS naghupot og 2-3 nga baraha may kahigayonan pa nga makasulod sa semis kun ilang madaog ang katapusan nilang duha ka duwa.

Puntos Matag Usa

Amancia (72) - Niñel 22, G. Giducos 16, Potencioso 13, T. Giducos 6, Tundag 5, Oñate 4, Aliposa 2

MJDL (68) - Medalle 15, Infantado 14, Trangia 12, Abellana 8, Gurrea 6, Paseol 6, Delaresco 4, Elloren 2, Miralles 2. – BANAT NEWS