Batang Peir vs. Wizards

Laban sa isang ‘offense oriented’ team na kagaya ng Batang Pier, ang gusto lamang ng Wizards ay makadikit sila hanggang sa huling bahagi ng laro.

“Our game plan is to make it close, bahala na down the stretch who will execute its game plan well but I like to believe that we really have to play solid defense against Harbour,” wika ni head coach Koy Banal.

Nakatakdang magtagpo ang five-time champions Harbour Centre at ang Magnolia Purewater ngayong alas-2:30 ng hapon sa Game One ng kanilang best-of-five championship series para sa 2009 PBL PG Flex Linoleum Cup sa The Arena sa San Juan. 

Sa kanilang kauna-unahang championship duel, winalis muna ng Batang Pier ang Hapee Complete Protectors, 3-0, habang tinakasan ng Wizards ang Bacchus Energy Warriors, 3-2, sa kani-kanilang semifinals wars.

Kung may nakikita mang bentahe si Harbour Centre mentor Jorge Gallent sa kanilang titular showdown, ito ay ang ‘fatigue’ na maaaring ipakita ng Magnolia ni Banal.

“They played five games in the semis, so I expect them to be a little tired going into our series,” wika ni Gallent sa Wizards. “So like what we did against Hapee Toothpaste in our series, we have to start aggressively.”

Kumpiyansa naman si Banal na hindi magiging dahilan ng kanilang pagkatalo ang kapaguran sa kanilang nakaraang semis wars ng Energy Kings.

“I like our situation,” wika ni Banal. “Yes, we went to Game 5 in the semis, medyo may fatigue factor pa pero hindi mo na iintindihin yan dahil sa sobrang hirap ng dinaanan mo. I don’t think magpapabaya yung mga players ko pagkatapos na makarating ulit kami sa finals.”

Tumuntong sa kanilang pang anim na sunod na finals stint na dumuplika sa nagawa ng Welcoat Paints, asam ng Harbour Centre, muling ipaparada sina Reed Juntilla, Edwin Asoro, Rico Maierhofer, Al Vergara, Mark Barroca at Jerwin Gaco, ang kanilang ikaanim na sunod na titulo sa ilalim ni Gallent.   (RCadayona)