Brillo, Gutierrez mag-uban

Cebu - Mag-uban na sab ang duha ka dekalibreng volleyball players dinhi sa Sugbu nga sila si Jusabelle Brillo ug Florian Gutierrez diin sila moduwa sa 1st Katipunan Mayor’s Cup Beach Volley Competition karong Pebrero 1 didto sa Katipunan, Zamboanga del Norte.

Ikaduha na kining higayon nilang Brillo ug Gutierrez nga nag-uban. Ang una niadtong Dapitan City National Invitational sa miaging tuig diin sila nidaog sa kampiyonato batok sa Negros Occidental.

Sila si Brillo ug Gutierrez magkaribal sa Nestea Beach Volley, apan ila una kining isalikway ang tanan aron mahatagan og maayong kumbati ang ilang kaatbang ug ingon man alang sa ilang kadaugan.

Ang umaabot nga kompetisyon magsilbe sab nga homecoming alang sa Gutierrez, kinsa lumad nga taga- Katipunan, Zambonga del Norte. – BANAT NEWS