B-Meg, 1-UTAK milansang daog sa Atan Guardo Barkadahan Cup

Cebu - Nagkumboya og 44 puntos sila si Virgil ‘Bing’ Pua ug Jone Sepe aron pangulohan ang perennial champion B-Meg ‘85 pagkulit og 88-75 nga kadaugan batok sa Batch ‘82 sa University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.

Si Zozobrado miantog og 18 puntos ug si multi-MVP awardee Lou Regidor miabuno og 13 puntos alang sa B-Meg, kinsa nakabentaha og nuybe puntos sa halftime, 40-31.

Wala na mahulga pa ang B-Meg sukad niadto hangtod nga naangkon ang 18 puntos nga kadaugan.

Sa sayo pa, ang 1-UTAK ‘96 nagsalig sa ilang mainitong rally sa nanghinapos sa duwa aron mapukan ang USC Blue 2004 sa iskor nga 80-70.

Naglabaw og siyete puntos ang 1-UTAK, 40-33 paghuman sa unang duha ka kuwarter, apan ang USC Blue miratsada sa sunod nga kuwarter aron pahakan ang labaw ug pagsikit sa duwa, 56-55.

Bisan pa niini, wala matarog ang 1-UTAK ug mipahimulos sa ilang kasinatian aron pagpiog sa USC Blue.

Ang USCBHABA tilt gipaluyohan sa Uniherb Philippines ni Jonathan ‘Atan’ Guardo.

Puntos Matag Usa

Unang duwa:

1-UTAK (80) - Abenido 26, Taborada 17, Chiongbian 12, Espinosa 9, Boniel 7, Balintag 5, Mulchandani 4

USC BLUE (70) - Sabala 35, Lazo 11, Ruiz 10, Quiman 8, Ompad 6

Ikaduhang duwa:

B-MEG (88) - Pua 24, Sepe 20, Zozobrado 18, Regidor 13, Aznar 8, Lu 4, Estrada 2

BATCH ‘82 (75) - Diaz 33, Belocura 17, Balangkig 16, Bantolinao 6, Honorio 3. – BANAT NEWS