Katsidis nanganti

Cebu - Kinilaway’g kumo maoy tuyo ni Australian braveheart Michael ‘The Great’ Katsidis sa iyang pag-anhi dinhi sa Sugbu.

Si Katsidis (23-2, 20KOs) mipasidaan ni Angel Hugo ‘El Tren’ Ramirez (19-4-2, 8KOs) nga angay kining mangandam sa ilang 12 ka hugna nga binakbakay alang sa bakanteng World Boxing Organization (WBO) Asia-Pacific lightweight title nga maoy main event sa eksplosibong “WAR” fight card karong Sabado sa gabii diha sa Cebu Coliseum.

Si Katsidis, kinsa mi-abiba sa Team Philippines atol sa Boxing World Cup duha ka tuig na ang nilabay didto sa Sacramento, California, mitug-an atol sa pre-fight news conference kagahapon didto sa Marriott Hotel nga ang pag-anhi ug ingon man pag-away dinhi sa Pilipinas naghatag katumanan sa iyang damgo ug iyang paningkamotan nga dili masugamak batok ni Ramirez.

“It is really a dream come true to be able to come and fight here in the Philippines. This is a great thing,” matud pa ni Katsidis, kinsa mimakmak ni ALA Stable standout Czar Amonsot sa ilang duguon ug bangis nga away alang sa interim WBO lightweight crown niadtong Hulyo 2007 nga mao untay makapahunong sa iyang boxing career.

Sa undercards sa quadruple championship extravaganza, ang walay pildeng Ciso ‘Kid Terrible’ Morales, Anthony ‘Rocky’ Marcial ug Marvin ‘Marvelous’ Sonsona, modepensa sa ilang tagsa-tagsa ka korona.

Si Morales (12-0, 8KOs) modepensa sa iyang WBO Oriental junior featherweight belt batok ni Pichitchoke Singmanasak (14-7, 9KOs), ang power-punching nga si Marcia (11-0, 10KOs) manalipod sab sa iyang WBO Oriental junior lightweight title batok sab sa walay pildeng si Thai power-hitter Vacharakrit Senayan (11-0, 9KOs), samtang si Sonsona (10-0, 9KOs) mosugal sa iyang WBO Asia-Pacific Youth flyweight title batok ni Liempetch Sor Veerapol (12-4, 8KOs).

Sa preliminary bouts ning maong boxing extravaganza nga gipadagan sa SGG Sports Promotions uban sa pakig-alayon sa higanteng TV network ABS-CBN, Ringstar Promotions, Cebu City Government ug Marriott Hotel, si Rolando Magallano sa Baliangao, Misamis Occidental makigsinukliay og kumo batok ni Kevin de la Cruz, samtang si Marvin Mabait sa Zamboanga City makigbinukbukay ni Marco Demicillo.

Ang mga tiket nga mapalit sa nagkadaiyang Sunburst outlets, Marriott Hotel ug Cebu Coliseum nagkantidad og P1,000 alang sa VIP-Sponsor, P500 sa ringside, P250 sa lower box, P150 sa upperbox ug P100 alang sa general admission.

Alang sa ticket reservations, mahimong motawag sa numero (032) 420-7029, 0918- 9797113 or 0916-5497184.

Sa laing bahin, gihangyo ni Sammy ‘Don King’ Gello-ani niadtong tanang motan-aw sa makasaysayanon nga boxing event sa pagtunga og sayo kay ang Katsidis-Ramirez fight himuon sa alas-7 sa gabii.

Ang mga gates ablihan sa alas-4 sa hapon diin ang mga away sugdan sa alas-5 sa hapon. – BANAT NEWS