Katsidis, Ramirez magkita karon sa "WAR" presscon

Cebu - Mag-abot sa labing unang higayon ang Australian ring bomber Michael 'The Great' Katsidis ug ang Argentinian brawler Angel Hugo 'El Tren' Ramirez alang sa pre-fight news conference sa umaabot nilang sangka nga giulohan og “WAR” karong alas-11:00 sa buntag diha sa Cebu City Marriot Hotel.

Si Katsidis, kinsa miabiba sa Team Philippines sa Boxing World Cup niadtong tuig 2007 didto sa Sacramento, California, makigsangka ni Ramirez alang sa bakanteng WBO Asia-Pacific lightweight title karong Sabado diha sa Cebu Coliseum.

Si Katsidis nagtinguha karong mobangon gikan sa duha ka sunod-sunod nga kapildihan ngadto sa mga kamot ni Joel Casamayor ug Julio Diaz niadtong miaging tuig. 

Motambong sab sa presscon karon ang ubang mga protagonista ning makasaysayanon nga quadruple championship extravaganza nga gipasiugdahan sa SGG Sports Promotions ni Sammy 'Don King' Gello-ani, uban sa ABS-CBN, RINGSTAR Promotions ug sa Cebu City Government.

Si Ciso 'Kid Terrible' Morales modepensa sa iyang WBO Oriental junior featherweight crown batok ni Pichitchoke Singmanasak, si Anthony 'Rocky' Marcial mosugal sa iyang WBO Oriental junior lightweight belt batok ni Vacharakrit Senayan, samtang si Marvin 'Marvelous' Sonsona modepensa usab sa iyang WBO Asia-Pacific Youth flyweight title batok ni Liempetch Sor Veerapol.

Laing mopakita sa ilang abilidad sa undercard mao si Rolando Magallano sa Baliangao, Misamis Occidental batok ni Ranelo Espra sa Mandaue City ug Marvin Mabait sa Zamboanga City batok Aljorge Tuñacao sa gikatakdang upat ka hugna nga binukbukay.

Ang binakbakay sugdan sa alas-5 sa hapon.

Ang mga tiket mapalit sa tag-P1,000 alang sa VIP-sponsor, P500 sa ringside, P250 sa lower box, P150 sa upperbox ug P100 alang sa general admission. Alang sa reservations, mahimong motawag sa numero (032) 420-7029, 0918- 9797113 or 0916-5497184. – BANAT NEWS