Cebu Blue Marlins nadagsa sa ikaduhang dapit

CEBU - Giangkon sa Cebu Blue Marlins (CBM) ang ikaduhang dapit sa 2nd Iloilo Dinagyang Swim Age-Group Swimfest didto sa Iloilo Sports Complex sa Lapaz, Iloilo City.

Sa kinatibuk-an, ang CBM mihipos og 3,860 puntos sunod sa overall champion Aquad Sports Swim Club sa Iloilo nga adunay 4,579 puntos.

Ang puntos nga nakuha sa CBM naggikan sa 29 ka golds, 33 ka silvers ug 20 ka bronzes.

Gawas nga nahimutang sa ikaduha, ang CBM nakabaton sab og upat ka most bemedalled swimmer awardees nga naglangkob nilang Anthony Linn Navarro, Noel Caneda, Rhys Michael Tapang ug Kristina Angelika Torres.

Si Navarro sa Cebu Eastern College nidaog isip most outstanding athlete sa developmental level human mihakot og 10 ka golds, usa ka silver sa boys’ 9-10 category.

Ang garbo sa University of Cebu nga si Caneda maoy kinamaayohan sa boys’ 15-17 class human mikabkab og upat ka bulawan ug usa ka silver.

Sila si Tapang ug Torres maoy nanghawod sa 6-under category sa ilang tulo ka golds ug usa ka silver matag usa.

Laing mga Sugbuanon, kinsa midaog og medalya ning duha ka adlaw nga kompetisyon naglakip nila ni Lyh Ann Navarro nga mikabkab og duha ka golds ug upat ka silvers, Michael Ichiro Kong nga mihakot og usa ka gold ug lima ka silvers, Trina Caneda nga usa ka gold, Paula Abigail Vega nga mitiltil og duha ka silvers, Romylin Ignacio ug Aimee Sanchez nga adunay usa ka silver matag usa, Michael David Vega nga mihakot og usa ka silver ug usa ka bronze ug sila si Jerose Rosada ug Cristine Indaya nga mihipos og tagsa ka bronze.    (BANAT NEWS)