Garces naghari sa Sinulog BMX showdown

Cebu - Walay pupanaganang mipasundayag si Jake Fred Garces sa iyang abilidad sa biseklita aron dominahon ang 9th Sinulog BMX Showdown niadtong miaging adlaw didto sa Cebu Grand Hotel.

Si Garces, usa sa nag-unang BMX riders kaniadto dinhi sa Sugbu, migamit sa karaan apan makadayeg nga kalaki ug ingon man uban sa mga bag-ong lansis nga nakadani sa mga hurado.

Mipahiluna sa ikaduha mao si Pipen Marquez dihang iyang napuhalan ang pipila ka mga beteranong riders, samtang si Larry Avila ang mikapyot sa ikatulong dapit ning maong kompetisyon nga gipasiugdahan sa Cebu BMX Riders Organization (CBRO).

Sa laing bahin, si Ramie Tan mao sab ang midaog sa super stock category sa 3rd Sinulog Moped Street Show niadtong Sabado sa Cebu Grand Hotel.

Gipukan ni Tan si Lezanro Alves ug Jun Alsado.

Si Henri Yu maoy mikubit sa modified bikes, gisundan ni Erwin Cabatingan ug Kenneth Gonzales.

Ang best costumized bike napunta ngadto sa entrante sa Team Underbone, samtang si John Lee Loquinario maoy nidaog sa best painted bike.

Sa iyang bahin, si Seth Capuras, gawas sa iyang pagka Mr. Friendship ngadto sa iyang kaubanang bikers, nanghawod sa slow ride competition, samtang si Oliver Suarez ang naghari sa slalom competition. - Yoyo R. Abayan (BANAT NEWS)