Cebu - Nangandam na karon sila si AJ Banal ug Czar Amonsot sa ilang pagkatkat og balik ibabaw sa ring aron makabawi sa ilang kapakyasan human gipilde sa tagsa-tagsa nila ka langyaw’ng kaatbang.
Si Banal gipaundang ni Panamanian Rafael Concepcion sa iyang kampanya alang sa WBA interim super flyweight title, samtang si Amonsot napukan sab batok ni Michael Katsidis sa Australia sa ilang WBO interim lightweight championship.
Karon ang duha paingon na sa dalan sa pagpanimalos, apan magsagubang kini og bug-at nga tahas gumikan kay ang harungon nilang Banal ug Amonsot mao man sila si Indonesian’s super flyweight champion Nouldy Manakane ug No. 2 lightweight contender Zoel Fidal.
Ang 25-anyos nga si Manakane maoy rated No. 4 sa Oriental ug Pacific Boxing Federation (OPBF) ug kasamtangang rated sa IBF Pan Pacific ug WBO Asia Pacific.
Nakaaway na siya og mga bantugang boksidors sama nilang world challengers Hussein Hussein sa Australia ug WBO No. 1 Posuwan Promunsak sa Thailand.
Makapabor hinuon si Banal ning maong awaya gumikan kay si Manakane wala pa maka-engkuwentro og Pinoy boxer ug wala pa sab kini maka-away dinhi sa Pilipinas.
Sa iyang bahin, ang 23-anyos nga Amonsot moharong sa laing walhong si Fidal, ang lig-ong boksidor sa Indonesia nga nakaaway na sa Thailand ug Australia. Sama ni Manakane, wala pa sab kini makaaway dinhi sa Pilipinas ug ingon man maka-engkuwentro og Pinoy boxer nga mao sab ang nakahatag og pabor ni Amonsot.
Ang double-header nga giulohan og “They Are Back” hiniusang gipasiugdahan sa ALA Promotions ug sa kagamhanan sa dakbayan sa Tagbilaran ubos sa liderato ni Mayor Dan Neri Lim.
Lain pang mopakita’g aksiyon ning maong boxing extravaganza karong Enero 31 diha sa Island City Mall carpark sa Tagbilaran City mao si Ricky Sismundo batok Daryl Pucdol sa Wakee Salud Stable, kanhi WBO Asia-Pacific champion Along Denoy batok Aljun Salogaol sa Cebu. Ang manghod ni Amonsot nga si Rocky moharong ni Samuel Galinato sa Jagna, Bohol. – BANAT NEWS