Cebu - Napuhalan sa University of San Jose-Recoletos (USJ-R) Team-A nga gipangulohan ni NM Rogelio Enriquez ang nag-unang mga koponan aron pag-angkon sa korona sa 2009 Cebu Sinulog Open chess tournament diha sa SM City-Cebu Entertainment Center.
Dobleng selebrasyon ang nabatonan sa USJ-R dihang ang ilang Team-B ni coach Bernardo Garces miangkon sa ikatulong dapit.
Ang sunod-sunod nga kadaugan sa USJ-R team batok sa Fe Fish Dealer ug sa Lapu-Lapu City sa katapusang duha ka rounds maoy ilang hagdanan pagkab-ot sa P25,000 nga ganting salapi.
Mipahiluna sa ikaduha nga dapit mao ang Cebu Progress Marketing. Ang Fe Fish Dealer mitapos sa ikaupat, gisundan sa Uniplus Gaming Center nga mikapyot sa ikalima nga dapit.
Mikompleto sa top 11 finishers mao ang Gorgonio Builders, Lapu-Lapu City, Sikad Talisay, OPASCOR, Sta. Cruz, Shell Gallery ug ang Barangay Day-as.
Sa laing bahin, ang mitunol sa mga ganting salapi ug tropeyo ngadto sa mga mananaog mao sila si Cebu City Councilor Sylvan 'Jack' Jakosalem, NM Matias 'Bombi' Aznaz III, Renato Casia ug Boy Pestaño sa organizing Cebu Executives and Professionals Chess Association (CEPCA), Asst. City Treasurer Emma Villarete ug tournament director ug FIDE arbiters Roger Abella ug Marvin Ruelan. – BANAT NEWS