Cebu - Andam na ang tanan alang sa Cebu Schools Athletics Foundation, Inc. (CESAFI) Beach Volleyball tournament karong Enero 31 diha sa Wiggy's Beach Resort sa Liloan, Cebu.
Si CESAFI beach volley tournament director Dr. Danilo Villadolid nagkanayon nga ang event duwaon sud sa tulo ka weekends.
"I called for a meeting and I let them decide on the date that the tournament should be played. This was supposedly scheduled last December but due to many activities, we decided to move it on January,” matud ni Villadolid.
Ang defending champions University of San Jose-Recoletos (USJ-R) ug University of San Carlos (USC) sa women ug men's divisions mosuway og depensa sa ilang titulo ug ning higayona ilang ikatimbang ang bag-o nilang magduduwa.
Si Michelle Simbajon sa USJ-R makig-uban ni Joy Bonita kay ang iyang kanhi teammate nga si Genie Sabas nahuman na sa iyang pag-eskuwela.
Ang lig-on nga karibal sa USJ-R mao ang Southwestern University (SWU) nila ni Danika Yolanda Gendrauli ug Lorie May Layno.
Sa men's division, si Roderick Arenasa sa USC makig-pares ni Kennith Bensig. Ang USC nagtinguha nga molangkat sa talagsaong grandslam.
Sa ilang kampanya sa grandslam, ang USC gilaumang makasugat og lisud nga duwa batok sa USJ-R, kinsa mikuha sa serbisyo ni Ariel Carumba ug Louijie Tipgos.
Mikompleto sa mga partisipanteng koponan mao ang University of Southern Philippines Foundation (USPF), University of Cebu (UC), Cebu Doctor's University (CDU), University of the Visayas (UV) ug ang Cebu Institute of Technology (CIT). – BANAT NEWS