CEBU - Walay kukaluoy nga gimasaker sa Pareko team ang mortal nga kaaway Ace Penzionne, 100-77 aron langkaton ang kampiyonato sa Lapu-Lapu Basketball Association (LLBA) Christmas League didto sa dakbayan sa Lapu-Lapu.
Ang Ace Penzionne unang mipahungaw sa ilang nagbagang opensiba hinungdan nga nakabentaha kini paghuman sa unang 10 minutos sa duwa.
Nausab ang dagan sa duwa sa second quarter ug nailog sa Pareko ang labaw sa halftime, apan sila si Buldog Ybañez ug Francisco sa Ace Penzionne mikiat sa ikatulong kuwarter ug mipatuasik sa ilang opensa aron ilogon og balik ang labaw.
Wala hinuon makalahutay ang Ace Penzionne ug nausik ang ilang mga paningkamot kay si Boboy Apolinar, ang kanhi USJ-R Jaguar, Boboy Ciriaco ug Ram Gomez sa Pareko milusad og mainitong rally aron pagposte og makabungog nga
kadaugan.
Si Apolinar, ang league MVP maoy nangulo sa Pareko sa iyang 20 puntos, gisundan ni Ciriaco kinsa miabuno og
17 puntos, samtang si Gomez miani og 14
puntos. Ang pilderong Ace Penzionne gipangulohan ni Francisco pinaagi sa iyang 17 puntos.
Sa laing aksiyon, yano sab kaayo nga gilubong sa Saymer ang Ann's Best Travel, 113-96 aron pagsakmit sa ikatulo nga dapit.
Si Andrew Paquibot maoy topscorer sa Saymer, kinsa mibahog og 30 puntos. Si Ruel Godinez miantog og 19 puntos alang sa maong kadaugan, samtang ang pilderong Ann's Best Travel gipangulohan ni Lito Augusto pinaagi sa iyang 20 puntos.
PUNTOS MATAG USA
Unang duwa:
SAYMER (113) -- Paquibot 30, Godinez R. 19, Arac 13, Aparta 9, Ybañez 9, Celes 6, Quijano M. 6, Nadado 5, Hiyas J. 5, Bucay 4, Sayson 4, Milicor 2, Hiyas I. 2, Celades 2
ANN'S BEST TRAVEL (96) -- Augusto 20, Juntilla 12, Cañete 11, Matidios 10, Madella 8, Lazaro 7, Pagobo 5, Oyao 4, Mahusay F. 3, Mahusay J. 2, Doheling 2, Alecer 1
Ikaduhang duwa:
PAREKO (100) -- Apolinar 20, Ciriaco 17, Giganto 15, Gomez 14, Augusto 11, Bancale 9, Aying 6, Bontes 6, Ompad 2, Amodia 2, Lamoste 2
ACE PENZIONNE (77) -- Francisco 17, Decembrano 12, Ybañez 9, Lapoja 8, Maloloy-on 5, Adlit 4, Seno 4, Portugaliza 3, Arreglo 3, Manlosa 3, Cañete 3, Asunsion 2, Gilig 2, Lizen 2 (BANAT NEWS)