Cebu - Walay kukaluoy nga gipanitan sa Assessment Division ang SUGBO Brokerage human miposte og 85-56 nga kadaugan sa nagpadayon nga 14th District Collector’s Cup basketball tournament 35-year below division niadtong miaging adlaw didto sa Vicente Sotto Memorial Complex sa brgy. Punta Princesa, ning dakbayan.
Human mapandol batok sa Amancia Brokers sa usa ka kulbahinam nga duwa, ang Assessment ni coach Rady Abarintos mipakita na sab og laing milagro. Human gilubong sa first half, 28-41, ang Assessment milusad og 30-3 nga rally aron pagsumpo sa SUGBO, kinsa mao na ang gilubong og 14 puntos, 58-44.
Si Biking Rollon mipupo og 19 puntos diin 11 gikan sa third quarter rally, samtang si Daniel Enriquez mitampo og 11 puntos alang sa Assessment nga miposte sa ilang ikaduhang daog.
Si Jufer Lopez maoy nangu sa SUGBO (3-0) pinaagi sa iyang 19 puntos.
Sa laing duwa ubos sa 35 years old above category, ang Cebu-Customs United Personeros Association (C-CUPA) mikunis-kunis sa Chamber of Customs Brokers, Inc. (CCBI), 109-73 aron sab pagposte og 2-1 nga baraha.
Midaog sab ang District Collector’s Office ni coach Atty. Paul Alcazaren human sila maka-ipsot batok sa Port Operations Division (POD), 88-85 aron makig-uban sa C-CUPA sa ikaduhang puwesto.
Si Joseph Jayme mi-iskor og 31 puntos alang sa District Collector’s Office ubos ni Collector Ricardo Belmonte, samtang si Litoy Gacquing mibahog og 24 puntos.
Sila si Allan Rama ug Talik Lazarta parehong mi-iskor og 20 puntos alang sa POD nga adunay 1-2 nga baraha.
Puntos Matag Usa
Unang duwa: (35 years above)
District Collector’s Office (88) --Jayme 31, Gacquing 24, Alinsug 9, Cadungog 4, Velarde 4, Reyes 4, De Joya 4, Pernito 4, Librando 2
POD (85) -- Raman 20, Lazarta 20, Flores 10, Repuela 9, Capilan 8, Mahinay 8, Corontos 2
Ikaduhang duwa: (35 years below)
Assessment (85) -- Rollon 19, Laborte 12, Enriquez 11, Francia 8, Perez 7, Trinidad 4, Pianyar 4, Cañete 4, Cañete 2, Ocon 2, Cadungog 2
SUGBO (56) -- Lopez 19, Maningo 11, Yu 9, Atillano 8, Mori 7, Sesante 2. - Gabby G. Malagar (BANAT NEWS)