CCC-CSD vs. ACN sa goodwill match

CEBU - Mopakita na sab sa ilang katakus ang Carmen Copper Corporation-Construction Services Department (CCC-CSD) Builders sa ila unyang pag-host batok sa ACN-Binglens sa usa ka exhibition game karong Pebrero 6 diha sa CCC Recreation Center sa Lutopan, Toledo City.

Ang Builders kinsa maoy kampiyon sa 1st Aloguinsan Mayor’s Cup sa miaging tuig, napilde ngadto sa M. Lhuillier Kwarta Padala-Cebu Niños sa usa ka exhibition game, apan midaog batok sa Toledo Dream sa lain nilang exhibition games.

Ang ACN-Binglens, nga gipanag-iya ug gidumala nila ni Allan C. Nazareno ug Bing Abbu ug gitimonan ni coach Ernie Diola, maoy defending champion sa Labangon Open basketball tournament.

Pipila sa mga magduduwa sa ACN/Binglens mao sila si Michael Almonte, Ope Abellana ug Reggie Licanda.

Ang Builders ni coach Boboy Cal gilangkuban nilang Jerry Jaca, Jan Montalbo, Wilbert Sayson, Raul Redulosa, Jared Kane Abatayo, Roy Arnado, Aldrin Ocañada ug Danny delos Santos, uban pa.

 Ang exhibition game tali sa Builders ug sa ACN/Binglens gihan-ay ni CCC team consultant Romy Cal.

Sa laing bahin, nagpadayon karon ang sabot-sabot nga dad-on didto sa Lutopan ang usa ka bearing game sa CESAFI-Partner's Cup sunod bulan. (BANAT NEWS)