Sinulog arnis championship sa Paseo

Cebu - Gikatakda na sab nga motaak dinhi sa Sugbu ang pipila ka mga bantugang   stick fighters dinhi sa nasud aron subling mopakita sa ilang katakus sa ipahigayong 4th Sinulog Arnis Championships karong Enero 17 diha sa Paseo sa Panagdait, Mabolo.

Si World Eskrima Kali Arnis Federation (WEKAF) executive director Gerald Cañete nagkanayon nga ang usa ka adlaw nga kompetisyon magsilbeng kick-off leg sa serye sa qualifying tournament nga maoy mohimbis sa morepresentar sa nasud ngadto sa 11th World Arnis Championship sunod tuig didto sa Mexico.

"The other significance of this event is that it’s our first tournament of the year and is held in line with the Sinulog festivities. That is the reason why it is open to the public free of charge," matud pa ni Cañete atol sa press conference niadtong miaging gabii didto sa Cocina Ysabella restaurant sa Paseo.

Dul-an sa 200 ka arnisadors lukop nasud ang maghinapakay ning maong kompetisyon nga gisuportahan sa WEKAF.

Mga bulawang medalya ang giandam alang niadtong top individual performers.

Matud pa ni Doce Pares International Supreme Grandmaster Dionisio 'Dionnie' Cañete nga adunay special awards nga madawat alang sa overall champion, best fight ug best fighter.

"My wish is for the Cebuanos to support the tournament in order to encourage more players to come out and participate because it’s part of the Sinulog celebration," matud pa ni Dionnie Cañete. "It’s also an opportunity for them to be part of the national team," dugang pa ni WEKAF president emeritus.

Ang Tacurong sa Sultan Kudarat gipaabot nga mopadala og daghang numero sa delegasyon.

Ang ubang out-of-town entries naggikan sa Zamboanga, General Santos City, Davao, Dumaguete City ug ang   Bayawan ug Mabinay sa Negros Oriental.

Dili sab magpabitin ang Philippine National Police (PNP) diin mopadala sab kini sa ilang mga lig-ong eskrimadors.

"We’re really expecting a lot of entries because not all participants are from Cebu but also from Manila and Mindanao," matud pa ni Gerald Cañete.

Ang pre-Sinulog extravaganza gitukod sa Doce Pares International uban sa pakig-alayon sa Paseo pinaagi ni John Paul Chiongbian, Arthro ni business-sportsman Jonathan 'Atan' Guardo ug Brilliant Metal Craft (BMC) ni Engr./Dr. Edward Dampur. – BANAT NEWS