Tabotabo midaog sa Andrada Cup

Cebu - Gisugdan sa Sugbuanong Vince Marc Tabotabo ang iyang kampanya sa 2009 pinaagi sa pagposte og daog sa boys 12-under category sa Andrada Cup Age-Group tennis tournament didto sa Rizal Memorial tennis court sa kaulohan kagahapon.

Ang 11-anyos nga si Tabotabo, kinsa gipaluyohan ni Cebu Vice Governor Greg Sanchez, mipukan ni seeded no. 2 Joel San Andres sud sa duha ka sets, 6-2, 6-4 aron pag-angkon sa iyang maiden title ning tuiga.

Ang kalampusan ni Tabotabo maoy hagdanan sa iyang dakung misyon didto sa Estados Unidos.

Si Tabotabo ug ang iyang amahan nga si Titus, kinsa mao sab ang mibarog isip coach mosalmot og mga torneyo didto sa Estados Unidos sa mosunod nga mga bulan.

Matud pa ni Titus, si Marc kasamtangan karong ranked 24th sa iyang age-bracket sa Estados Unidos. – BANAT NEWS