ALA Boxing Gym mopasiugda og upat ka dagkung promosyon

Cebu - Subhan sa nabantog nga ALA Boxing Gym ang bag-ong tuig pinaagi sa pagpila og upat ka mga dagkung promosyon ug usa ka world title fight didto sa gawas sa sud sa duha ka bulan nga gibitoonan nilang AJ 'Bazooka' Banal ug Czar Amonsot ug ingon man ni Z 'The Dream' Gorres, kinsa moaway sa labing unang higayon ubos sa bantamweight division.

Ang mga aktibidades sa ALA Promotions ning tuiga sugdan pinaagi sa Summit Fight Night Boxing Tour-Sinulog card karong Enero 18 diha sa Gaisano Countrymall carpark.

Mangulo sa maong engkuwentro mao si two-time world challenger Eriberto 'Ioka' Gejon Jr., kinsa makighamag ni Roldan Malinao.

Lain pang mopakita'g aksiyon mao si Jomanz Omanz batok Carlo Magale, James Bacon batok Jaypee Ignacio ug Roli Gasca batok Greg Mangan.

Sama ni Gorres, si Banal nangita sab og hayag nga kaugmaon ubos sa landong sa bantamweight division, ug si Amonsot nga mokatkat og balik sa ring maoy mga bida sa boxing card nga giulohan og "They Are Back" karong Enero 31 didto sa Island City Mall carpark sa Tagbilaran City.

Si Banal makigharong ni South African Nouldy Manakane, samtang si Amonsot makigsangka ni Zoel Fidal sa gikatakdang 10 ka hugna nga non-title fights.

Kini maoy unang away ni Banal sukad sa iyang 9th round KO nga kapildihan ngadto ni Panamian Rafael 'El Torito' Concepcion sa ilang interim WBA super flyweight championship bout niadtong Hulyo 26, 2008 sa Cebu Coliseum.

Sa laing bahin, si Gorres, moaway alang sa WBO Oriental bantamweight championship batok sa Mexican Cecilio Santos o dili ba sa Australian Hussein Hussein karong Pebrero 28 diha sa grand ballroom sa Waterfront Cebu City Hotel and Casino.

Sa maong baraha, si Milan Melindo moladlad sa iyang abilidad batok ni kanhi IBF minimumweight champion Muhammad Rachman sa Indonesia.

Sa iyang bahin, si Nietes mohimo sa ikaduhang pagdepensa sa iyang WBO crown batok ni Erik Ramirez sa Mexico karong Pebrero 28 didto sa Qaxaca, Mexico City. - Yoyo R. Abayan (BANAT NEWS)