Bangon, Ala Boys

Cebu - HAPPY NEW YEAR! Karon lang ko kahigayon og greet ninyo mga suki namong tigbasa sa Banat News ug sa uban pa natong mga kaigsoonan kay mao pa man sab kini ang unang lindog nga akong idalit kaninyo karong tuiga. Hinaut nga bisan pa man sa wala ug tuo nga krisis nga misagpa kanato, mabungahon ug malipayon gihapon nga tuig ang atong baktason karong 2009.

* * *

Human sa dili kaayo mabulokon nilang tuig 2008, maayong balita maoy misugat sa ALA Boxing Gym sa bag-ong tuig. Gihatagan naman gud og clearance sa mga medical expert dinhi sa nasud ug didto sa Amerika ang ilang boksidor nga si Czar Amonsot nga maka-away na og balik ibabaw sa ring.

Kahinumduman nga si Amonsot gi-ban sa pamuksing didto sa Amerika sa dihang nasuta sa mga doktor nga nakasinati siya og injury sa iyang ulo human sa dugoon niyang engkuwentro batok sa Australyanong si Michael Katsidis niadtong Hulyo 21, 2007 didto sa Las Vegas. Nagtuo gani ang uban na mao nga kadto ang utlanan sa career ni Amonsot.

Apan human sa serye sa mga medical test dinhi ug gawas sa nasud, nasuta sa mga doktor nga hingpit nang nahanaw ang nasigpatan nilang gamay'ng pagdugo sa bagol-bagol ni Amonsot. Mao kini ang hinungdan nga gihatagan siya og “clean bill of health” sa mga doktor. Laktod pagkasulti, puyde na siyang mo-away bisan kanus-a niya gusto. Si Amonsot bata pa ug dunay abilidad. Kun iya kini pa-amanan og disiplina ug determinasyon, dako ang akong pagtuo nga makabangon pa siya.

* * *

Lain pang bitoon sa ALA Boys nga taas akong pagsalig nga makabarog pa human sa mapait nilang pagkahisukamod sa miaging tuig mao ang paborito nakong si AJ “Bazooka” Banal ug si Rey “Boom Boom” Bautista.

Gibuak ni Banal ang kasing-kasing sa iyang mga fans human siya gipalukapa ni Panamian Rafael “El Torito” Concepcion sa ika-10 nga hugna sa ilang WBA interim super flyweight championship niadtong Hunyo 26, 2008 diha sa Cebu Coliseum. Wa damha ang kapakyasan ni Banal gumikan kay wa pa man siyay pilde niadtong tungora gawas pa nga mi-away sa kaugalingon niyang tugkaran diin siya gi-alirongan ug gi-abibahan sa liboan niya ka dumadapig.

Sa habig ni Boom Boom, nahingangha sab ang iyang mga disipulo human siya gidabo-dabo og kulata ni Heriberto Ruiz dayon na ngadto sa pagkapukan niini pinaagi sa unanimous decision sud sa walo ka hugna niadtong Nobiyembre 22, 2008 didto sa Las Vegas. Imbes nga mohimo og impresyon, nauwawan hinoon si Boom Boom sa iyang comeback fight human sa iyang makapakugang nga kaparotan pinaagi sa first round KO ngadto ni kanhi WBO super bantamweight champion Daniel Ponce de Leon duha ka tuig ang milabay.

Hinoon dili pa uwahi ang tanan kay sigun sa gikasulti ko na, mga bata pa sila ug dunay talento. Dunay panahon sa atong kinabuhi nga kita madagma. Apan anaa ra kana kanato unsaon nato paglantaw kining tanan nga mga pagsulay - himoon ba kini natong hagdanan aron kab-oton ang atong mga damgo o pasagdaan na lang ba kaha nato kini nga mamahimong babag sa atong kalampusan. Mao na nga ang akong hagit kanila karong tuiga, Bangon, ALA Boys!

* * *

Karon diay'ng adlawa mahibaw-an nato unsay mga plano sa ALA Gym karong tuiga ug ingon man sa ilang mga boksidor kay ato man silang makasawo og paniudto diha sa Sugbahan Restaurant sa may dalan A.S. Fortuna dakbayan sa Mandaue. Ug sa dili pa nako tak-opon kining akong artikulo, ako diay ipadangat ang mainiton nakong pahalipay ngadto ni “Master Ekin” Benigno R. Caniga, Jr. nga magsaulog sa adlaw niyang natawhan karong adlawa. Si Sir Ekin, nga maoy nagtukod ug kasamtangang pangulo sa Yaw-Yaw ArDigma Martial Arts Federation, Inc. sa Sugbu ug sa tibuok Vis-Min region, gi-isip nakong suod nga higala dili tungod kay konektado siya sa sports kundili tungod sa iyang pagkamatinud-anon ug maayong kinaiya. Sir Ekin, Happy, Happy Birthday. Stay safe and sound always. God bless.

Kun dunay mga reaksiyon o pangutana, mahimong motawag sa telepono 253-1276 local 241 o e-mail sa [email protected]. - BANAT NEWS