Wins

CEBU - Matag buwangan adunay lainlain nga pakulo aron lang dugokon sa mga mahiligon sa sultada. Basta holiday daghan gyud ang motambong sa sultada. Naandan na kini natong mga Pilipino. Didto sa Carlock o Mahayahay uno sunod-sunod ang ilang pagpa-derby, pagka 21 sa Disyembre dunay special curom nga 6 cocks, pagka 22 hangtod na sa disperas sa Pasko adunay 3 cocks derby.

Didto sab sa silingan nga lungsod Jetafe Bohol nagpahigayon usab sila og 2 cocks derby nga gisalmotan sa matag barangay. Bisan daghan sa mga buwangan nga nagpahigayon og mga promosyon sa sultada wala gihapon ka santa sa uban nga magbuhat og tigbakay.

Mao nga diha sa mga hilithilit nga mga barangay nila gipahigayon ang sultada. Gani didto sa barangay Tinago bisan sa baha ug ulan nahimong malampuson ang ilang kapistahan ug ang sultada.

Didto sa Soong Cockpit lungsod sa Lapu-lapu gipahigayon ang tinuig nga 3win's. Maka-agni gyud kini sa mga mahiligon sa sultada kay adunay nagtangag nga kinsi mil ka pesos, wala kini pot money nga susama sa derby. Parihistro ka lang apil na ang imong manok sa maong programa. Niadtong petsa 25 sa Disyembre adlaw nga natawhan sa atong Ginoong Jesus o Pasko, mao usab ang adlaw nga gipahigayon ang 3wins. Sa kadaghan nga nisalmot sa maong sultada nahimong duha ang ruedahan. Taas kaayo ang linya, maayo lang gani kay gipangitaan og sulosyon sa nagdumala. Wala una pataria ang mga manok kun dili kini haduol na sa gikatakdang sultada aron malikayan ang pagkingking sa tagsatagsa ka mga manok. Malampuson nga nahuman ang 3wins. Gibahin ang entry sa matag manok, sa buntag magparehistro ang unang manok ug pagka gabii na ang 2 ka manok .

Alang na sa championship match, usa ako sa misalmot sa maong 3wins, kay taga Lapulapu man ang naggalam sa akong mga manok nga si Mario Batillere sa barangay Pajac. Duha ka entry ang na-rehistro G-wing ug ang G-wing2. Pulos nakabuno ang unang mga manok sa duha ka entry. mao nga pagkagabii mibalik mi aron sa pagpanimpalad sa 3wins. Pag-abot namo sa maong lugar amo gidayon nga gipalegbanan ang among mga manok aron sa pagpamatuod nga kini apil sa 3wins. Na una ang binabae nga manok nga among gidala, nahugyaw sa makadiyot ang sultada sa akong mga daklit nga abiba, asta si Miloy na lingaw kay bisan nagkalison ang tagsa-tagsa namo ka manok nagpadayon kini sa pagkumbati.

Ang kaatbang taliwala sa kakusog nag-inanay nga naloya. Ang ako usab nga nagtikoka kay nabuko-buko ug na bali ang pako nagpadayon paman og tusik, napupos gyud ang gihatag nga oras sa sultada ug gidiklarar sa kuyme nga labihan nang kapoya sa tan-aw ko nga tabla.

Sa akong bahin natuyok nako sa makadaghan ang ruedahan, gani sa akong mga abiba asta mga manan-away nalingaw pwera sa wala. Kinsa man say dili maka abiba sa mga manok nga pulos nagkalisod. Daw musalta ang atong sampot matag bunal sa tagsa-tagsa ka manok.

Hasta gud ang kuyme nagkatawa sa akong abiba nga ipaapil nako og pabunal ug pakoot ang iyang sampot sa akong manok. Kato kumedya lang bisan pa magkina- unsa ang manok wala gyud kitay labot. Ang kalipay natong mga mahiligon sa sultada dili ka bayran og kwarta. (BANAT NEWS)